uMthunywa
YiNtatheli kaMthunywa
KULENINA leSingeni eLupane elisele limabavubavu ngemva kokubhaxabulwa ngumkalo kubangwa umlayezo ongene kumakhalekhukhwini.
Isehlakalo lesi senzakale kumaviki amathathu edluleyo lapho uMnumzana Banele Moyo abhaxabule umkakhe, uSibekiwe Moyo ngesitorobho kubangwa umlayezo ongene kumakhalekhukhwini wakhe othi “sithandwa”.
Esinye isihlobo esikhuluma loMthunywa uNkosazana Bongiwe Moyo uthe uMnu Moyo watshiya unkosikazi wakhe ethoba amanxeba kubangwa umlayezo kamakhalekhukhwini.
“UMoyo uthi wayethwele umakhalekhukhwini womkakhe kwangena umlayezo ubhalwe ‘sweetness’ uthi inombolo zakhona zazilebizo efonini yomkakhe.
“Okwamvusa umhlonga yikuthi katholanga impendulo ecacayo kumkakhe okuyikho okwamenza wamtshaya ngoba umlayezo lo awuzange umphathe kuhle.
“Mina ngabizwa umakoti esetshayiwe ngisiyaxazulula udaba lwakhona, ekufikeni kwami akuzange kube lempendulo esuthisayo eyaphumayo,” kubika uNkszn Moyo.
Uqhubekele phambili eveza ukuba umathumela umlayezo wacina efonelwa.
“Owathumeza umlayezo laye wafonelwa ngikhona wabuzwa ukuthi uyamazi yini uSibekiwe wavuma kodwa wathi lowomlayezo ulahlekile. Asazi mhlawumbe wayesetsheliwe ukuthi uzafonelwa ngoba impendulo asipha yona iyasolisa. Engingakutsho yikuthi umuntu owendileyo olendandatho akuvumi ukuba abethola imilayezo yothando ivela kwenye indoda,” kuchaza uNkszn Moyo.
Ekhuluma lentatheli uMnu Moyo uveze ukuba umlayezo awuzange umphathe kuhle.
“Kubi kakhulu ukuthi unkosikazi omthetheyo athunyelwe umlayezo wokuthi ‘sithandwa’ ngenye indoda, ngamtshela ukuthi akwekele nxa ekwenza thina amadoda sizonda kubi, ukumtshaya ngamethusela kuphela wahle wahlaba umkhosi kungela kutshaywa,” kubika uMnu Moyo
Iphephandaba likazulu likhulumisane loNkkz Moyo ophike wemba phansi ngaloludaba.
“Mina okhuluma ngakho okomlayezo angikwazi njalo akulanto engingayikhuluma singazani,” kuphetha uNkkz Moyo.
