uMthunywa
Blessing Moyo
ULEWIS Ndlovu odume ngokutfundisa abantwana ukutshaya ingungu kuqembu le, The Drums of Peace usekhiphe ugwalo lwakhe lwakuqala lwenganekwane zabasakhulayo oluhlose ukubakhuthaza ukubala.
UNdlovu wethule ugwalo lwakhe lwakuqala lolu olulesihloko esithi: “Parliament of animals” eThe Orange Elephant koBulawayo.
UNdlovu uthe ubone kuqakathekile ukuthi njengoba esebenza ukufundisa abantwana ukuhlabela lokutshaya ingungu ubone kulicebo elihle ukuthi lokhu akufundisa abantwana akubhale phansi ukuze abantwana bangakukhohlwa.
UNdlovu kanye leqembu lakhe leDrums of Peace betha inganekwane ngapha betshaya ingungu okwenza abantwana bathakazelele lokhu abakufundiswayo.
Ekhuluma lentatheli kaMthunywa uLewis uchaze ukuthi ubhale ibhuku elilodwa elilendaba ezimbili.
“Indaba yakuqala nguThe Parliament of animals okuyindaba yabantwana, ekhuluma ngenyamazana ebeseziswele amanzi ezinye sezisifa, inyamazana lezi zahlangana zonke zihlanganisa imibono yokuthi amanzi zingawathola njani. Onguye owayekhokhela lezi inyamazana nguSilwane.
Eyinye indaba esegwalweni ngethi, Who is wise, le-ke ngeyabantwana asebekhulile kusukisela kwabafunda ugwalo lwesikhombisa kumfundo yaphansi labakugwalo lokuqala kumfundo yaphezulu.
Indaba esebhukwini ikhuluma ngendoda ehlakaniphileyo okuthiwa nguLuso owayesenelisa ukukhuluma lamatshe kanye lenyoni kudala,” kutsho uLewis.
Uthe ukusebenza labantwana kumenze wananzelela ukuthi basilela ekubaleni yikho ngaqala ukubhala njalo ngibone kungcono ukuthatha engikwenzayo labantwana nxa siseDrums of Peace kube yinto ebhalwayo ezenelisa ukuhlala iminyaka.
“Kungithethe iminyaka emine ukubhala lokuhlela kuhle ibhuku leli ukuze lilungele ukubalwa ngabantu bonke jikelele,” kuphetha uNdlovu.
