uMthunywa
Ethel Ncube
KULENINA leWoodlands eGweru elisele litshwaqe umzimba ngemva kokungenelwa yisigelekeqe endlini sathatha imali andubana sithumbe indodakazi yalo siyoyidlwengula egangeni ngempelaviki.
Umamangala kubikwa wayelele labantwabakhe abane isigelekeqe lesi size sibangenele.
Kubikwa ukuba isigebenga lesi safika satshela umamangala ukuthi umuntu owayehlala kuleyondlu wayelesikwelede sakhe seUS$60 kungakho uyayifuna.
Umamangala loba wathi ule US$45 kuphela, umetheswacala kubikwa wathi ngenxa yokuba kusele iUS$15 uzahamba lomntwana oyinkazana afika wamdlwengula egangeni waze wabuya ngosuku olulandelayo ekuseni.
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba indaba le isezandleni zamapholisa,
“Indaba le siyitholile sisachwayisisa ngayo. Sicela uzulu ongabe elolwazi ngomuntu odale lelicala athumele umlayezo emapholiseni aseduzane laye.
“Sicela uzulu lapho abahlala khona bafunde ukwenza amaqembu enkundleni zokuxhumana ukuze nxa omunye esevelelwe luhlupho olufana lalolu enelise ukutshela omakhelwane bona abangavuka bamncedise kumbe babikele amapholisa,” kuphetha uInsp Mahoko.
