uMthunywa
Bongani Ndlovu
KULENDODA yeLupane emangalise omakhelwane bayo kulandela ukudonsela umfowabo osengumuyi enkundleni emethesa icala lokungabhadali irenti, phezu kwalokhu ufuna imali yokugezisa umuzi wakhe lapho umuyi afela khona.
Intatheli kaMthunywa izwe ukuba uMnumzana Million Sibanda udonsele imuli yomfowabo uSteven Bhansa osekulemnyaka emithathu wedlula emhlabeni enkundleni kamlisa uMnumzana Norman Moyo efuna imuli yomfowabo ibhadale inkomo eyodwa yokugezisa indlu afela kiyo kanye lemali yerenti lapho okwasala impahla zakhe esithi wayengafaka iloja elalingabe limbhadala.
Umlisa uMnu Moyo uthe ngenxa yokuba indaba le ngeyomdeni ubanike isikhathi sokuba bahlale phansi bakhulumisane njengemuli. Ubanike ithuba lokuba bakhulumisane kuhle njengoba bengabomdeni.
“Kuliqiniso ukuba ngoMvulo besithonisa indaba elethwe nguSibanda esithi ufuna imuli yomnewabo owatshona ngo2016 ibhadale imali yerenti kanye leyokugezisa umuzi wakhe. Imuli kamuyi ibimelwe nguBusani Sibanda ongumntaka muyi,” kutsho uMnu Moyo.
Uqhubekele phambili esithi uSibanda ubevele engajiki esithi ufuna ukubhadalwa.
“USibanda uthe ufuna abantwana bakamuyi bambhadale inkomo yokugezisa indlu yakhe njalo baphinde babhadale imali yerenti lapho obekugcinwe khona impahla zikayise ngoba ubelakho ukufaka iloja ebelingabe limnika imali,” nguMoyo lo.
Iphephandaba likazulu libuye laxoxisana loMnu Sibanda ongazange awulandule umhlolo lo.
“Yebo kuliqiniso ukuba besisenkundleni kamlisa uMoyo lapho ebengihambe ngisiyadinga inhlawulo kunkosikazi kamfowethu labantwabakhe yokugezisa indlu kanye lemali yerenti yalapho obekugcinwe khona impahla zomnewethu,” kuchaza uMnu Sibanda.
Uqhubeke waveza ukuba bekungasinjongo yakhe ukumangalela imuli yomfowabo kodwa bamphoxa kuleso senzo.
“Umfowethu wabuya kimi engezwa kuhle wafika wahlala waze wedlula emhlabeni, ngemva kokutshona komfowethu ngomnyaka ka2016 imuli yakhe yala ukuzolanda impahla yakhe isithi angidinge imota ngizilethe yikho lami ngize ngabadonsela enkundleni kamlisa ngoMvulo,” kuphetha uMnu Million Sibanda.
