uMthunywa
OWAYENGUMDLALI WeBafana Bafana, uLucas “Rhoo” Radebe, ubona kungcono ukuthi kungaphakanyiswa uBenni McCarthy njengomqeqetshi olandelayo weqembu lesizwe.
URadebe wayengukaputeni weBafana adlale kuyo imidlalo engu-70.
Ngomunye wabadlali abazakhela igama ku-English Premier League esayibamba ku-Leeds United.
Uphawule lokhu ngemva kwenkulumo ezisabalele ezokuthi iqembu lesizwe sekufanele libuyele esandleni somqeqetshi waseMzansi.
Kukhona abaphakamisa ukuthi iSouth African Football Association (Safa) iqhatshe uMcCarthy.
UMcCarthy unqobe inkezo yeMTN leCape Town City kulisizini. Nguye umqeqetshi oleziqu zokuqeqetsha eziphezulu ukubadlula bonke nanko utshaya nge-Uefa Pro Licence.
Kumaviki adluleyo uPitso Mosimane, opheka iMamelodi Sundowns, uphumele sobala ngokuthi ubona umqeqetshi wakusasa oweBafana kunguMcCarthy.
“Ngokwami uBenni kunengi okusafanele akufunde. Lo ngumbono wami. Usendleleni enhle okwamanje. Izinga lakhe liyavela kancane kancane. Ngicabanga ukuthi angaba nguye umqeqetshi weBafana eminyakeni ezayo,” kutsho uRadebe.
Kumanje iBafana, ebikade idlala umdlalo wokugcina wokuhlungela i-Africa Cup of Nations (Afcon) leLibya izolo ebusuku, iqeqetshwa nguStuart Baxter. UBaxter uvele uhlezi ngesinqe esisodwa esikhundleni.
Sekuvele kanengi ukuthi iSafa ifuna ukumchitha phezu kokuba elenkontileka ende.
URadebe ngomunye wabadlali abahlonitshwayo kodwa abatshaywa ngesithende yiSafa phezu kokuba ihlala ithembisa ukuthi izozisondeza izinkakha.
Ukuchithile ukuthi wanqaba iSafa imfaka kwesinye isikhundla.
“Angikaze nginqabe lutho oluvela kuSafa. Ngihlala ngisitsho ukuthi ngikulungele ukusiza noma yikuphi lapho ngingabanjiswa khona. Kodwa kudingeka sihlale phansi sikhulume ngakho. Akukho asebake bakubeka etafuleni futhi angikaze nginqabe lutho. Ngifuna kucace lokho. Abakaze bakhulume lami,” kutsho uRadebe.
UBaxter wasayina leSafa inkontileka ephela emva kweNdebe yoMhlaba yango-2022 eQatar.
Usanda kuzibophezela ukuthi uma ehlulekile wukuya kwi-Afcon uzatshiya umsebenzi.
Wehluleka ukufaka iBafana kuNdebe yoMhlaba ebiseRussia nyakenye.
