uMthunywa
YiNtatheli kaMthunywa
UBENJANI Mwaruwari owake waba ngukaputeni weqembu lamaWarriors usephindele kuqembu le-Portsmouth eNgilandi lapho afundela ukuba ngumqeqetshi, nanko usebanga emaphethelweni okuthola isithupha se-Uefa A.
Umdlali lo ubike ukuba ngenyanga kaMpandula uzabe esebizwa njengomqeqetshi kodwa uzaqala athole ulwazi olujulileyo anduba adinge iqembu angalikhuza.
“Okwamanje ngisafundela iSports Management. Kubalulekile ukuthi umuntu ahlale elolwazi. Sengisiyaqeda izifundo zami zokuqeqetsha ngesithupha se-Uefa A, ngikuqembu lePortsmouth,” kutsho uMwaruwari.
Kuliviki uphume ebulenjini ebika ukuthi ukhathazekile ngokuphathwa kwenhlanganiso yeZimbabwe Football Association (Zifa). Uthe sekuyisikhathi sokuthi inhlanganiso le ikhokhelwe ngabasakhulayo, ikakhulu labo abake badlala inguqu.
UMwaruwari uthe inengi lenkokheli zenguqu kuleli ziyesaba ukuthi linhlanganiso ikhokhelwe yilabo abake badlala inguqu.
“Inkinga yikuthi bakhona abantu kuZifa abesabayo. Bayesaba ukuthi abadlali asebatshiya umdlalo bazakwenza ngcono.”
Ukhetho lwenkokheli yeZifa luzaqhutshwa ngomnyaka ka-2022.
Uthe kuyisifiso sakhe ukuthi iZifa ikhokhelwe ngu-Alois Bunjira owake wadlala inguqu.
“U-Alois kangene kukhetho, kumele simsekele. Ngikhulume laye ngamthembisa ukuthi ngizamsekela.”
UMwaruwari wake wadlalela iManchester City, Blackburn Rovers lePortsmouth engumgadli.
