uMthunywa
YiNtatheli KaMthunywa
OWAYENGUMGADLI olodumo weManchester City leqembu lesizwe lamaWarriors, uBenjani Mwaruwari, welule isandla sakhe sokupha lapho anike khona abadlali beHighlanders, Zulu Chiefs lezakhamizi zeOld Mgwegwe ukudla ngesikhathi ilizwe lomhlaba wonke jikelele ubhekane lesifo seCovid-19.
UMwaruwari yena owake waba ngumkhokheli weqembu lesizwe unike imuli ezingu-900 ukudla okugoqela i-10kg yemphuphu, 750ml yamafutha okupheka, le500g yendumba.
Abadlali beBoso abangatshumi amathathu kanye labalolongi babo bamukele izipho lezi.
Umnewabo kaMwaruwari, uChris uthe ngemva kukunanzelela ububi obuze lomkhuhlane weCovid-19 bakubone kufanele ukuthi baphathise uzulu.
Uzulu inikezwe izipho lezi enkundleni yeMarisha eseOld Magwegwe, lapho uMwaruwari alolongela khona ukudlala inguqu esakhula.
“Siyakwazi ukuthi sibhekane lodubo. Ngemva kukulahlekelwa luncedo obeluvela kuNetOne, abadlali beHighlanders labo baphakathi kwalo loludubo. Ngokunjalo sibone kufanele ukuthi siphathise ngalokho esilakho.
“IZulu Chiefs liqembu likaBenjani lakudala lokuzithokozisa. Ngokunjalo abadlali labasekeli baleliqembu labo bathole loluncedo,” kutsho uChris.
Njengomuntu owakhulela gemva kokukhulela elokitshini leOld Magwegwe, uBenjani ubone kufanele ukuthi elule isandla sokupha kuzakhamizi.
Lesisenzo somusa ubuye njalo wasitshengisa kubogogo labokhulu abahlala Entembeni.
Entembeni iselokitshini leLuveve.
