Ncekwenhle Ncube
UMDLALI weqembu lesizwe njalo engumgadli weOrlando Pirates uTendai Ndoro useveze ukuthi uzwa ubuhlungu ngokuncitshwa ithuba lokudlala kunkezo yeAfcon ka2017 eyaqhutshwa eGabon.
Noma wenza izimanga ngokutshayela emambuleni amagoli angu-11 kumidlalo engu-13 kumidlalo yeAbsa ayidlalayo, uNdoro (32) wazithola ehlezi phandle ebukele iqembu lesizwe kudlala uNyasha Mushekwi, Knowledge Musona kanye loEvans Rusike.
Ekhuluma emsakazweni weSouth Africa kuLaduma umgadli waMabhakaniya uthe ngokubona kwakhe wayebiziwe ukuzogcwalisa inani labantu ababehamba kodwa emacebeni kamqeqetshi wamaWarriors, uCallisto Pasuwa wayengekho.
“Iqiniso yikuthi ngahamba kuphela ukuyagcwalisa inani labadlali kodwa ngangingafunwa ngumqeqetshi. Okwenza ngahlohla igole leliyana elilodwa ngangifuna ukumbonisa ukuthi ngemizuzu emincane ngiyenelisa ukwenza noma yini. Angijabulanga ngethuba engaliphiwa nguPasuwa emidlalweni yonke,” kutsho uNdoro.
Uqhubeke esithi, “kwakulabagadli begedi abanengi eqenjini ababenganqobisa iqembu kodwa umqeqetshi wehluleka ukubafaka ngendlela abadlala ngayo. Amabhola aphezulu ehlula ukuthi anqobise iqembu yikho lalapho ngingena ngehluleka ukudlala. Angisomdlali ohlupha imvimbi kodwa ngifuna ibhola esikhaleni ngitshayele emambuleni.
UNdoro ubike ukuthi ngaphandle kokudliwa kokuphuma besemsileni beliqembu kunengi abakufundayo emdlalweni lo.
Ubuye njalo wachaza ukuthi iqembu lehliswa umdladla yiZifa ngokuthi behambe beyedlala bengela-kit eqondane labo.
“Kuqakathekile ukuthi abakhokheli bethu beqakathekise ibhola ngoba ngeke uye emdlaweni emikhulu njengale ungela-kit yokulolonga. Bebekwazi ukuthi sizadlala kulenyanga ezintathu phambili kodwa i-kit yazobuya sekusele isikhathi esincane ukuthi sidlale,” kutsho uNdoro.