uMthunywa
Nkosilathi Sibanda
ABADLALI besifazane kumdlalo wenguqu kumele baphakanyiswe, bathole amathuba alingana labesilisa ukuze benelise ukuphila impilo engcono.
Lokhu kuvezwe linengi lezikhulumi ngesikhathi kukhunjulwa uCecelia Malunga inkokheli yomdlalo wenguqu yabesifazane odlule emhlabeni ngoLwesine olwedluleyo, ngemva kokugula isikhatshana.
Ubekwe lamuhla emathuneni eLady Stanley koBulawayo.
UMalunga ubelilunga lenhlanganiso yeZifa, aphinde abelilunga elipheleleyo leqembu leHighlanders. Unconywe kakhulu ngokuvuselela ingatsha zabalandeli beBosso ezigcwele phose wonke amadolobho laphetsheya.
Ekhuluma ngokusebenza lomuyi kunguqu, uSamukeliso Silengane uthe uMalunga ubeyinsika yokuphumelela kwamaqembu enguqu yabesifazane.
“Umama uCecelia Malunga ubengumama wethu sonke. Wakhetha ukuthi asebenzele ukuphakamisa amalungelo abomama, ikakhulu ngokuvusa inhlelo zenguqu.
Silahlekelwe,” kutsho uSilengane owake waba yinkokheli yenguqu lenhlanganiso yabonompembe kuleli.
Umaqhuzu wePremier Soccer League uKennedy Ndebele uthe wafunda okunengi kumuyi mayelana ngokukhokhela inguqu.
“Kunzima kithi sonke esasebenza laye okweminyaka eyedlula amatshumi amabili. Ubelothando lomdlalo, efuna ngaso sonke isikhathi ukuthi aphakamise abantwana abangamankaza kumdlalo webhola. Kuminyaka yonke le, ubephawula imfundiso njalo banengi abathola ulwazi kuye.”
Owake waba ngumaqhuzu weZifa uJonathan Mashingaidze uthe uMalunga ubeyinkokheli kuzwa.
“Ubekhuthale kunguqu, umdlalo awenza waba yimpilo yakhe. Ubengalali, ehlala njalonje eletha imibono lamacebo okuguqula impilo zabadlali. Kwezobukhokheli ubeyingcitshi.”
Isimo somdlalo wenguqu yabesifazane okwakhathesi siphezulu ngenxa kamuyi, ngokutsho komunye owasebenza laye, uElizabeth Langa.
“Konke esikubona kumdlalo wenguqu kungenxa kaCecelia Malunga labanye aqalisa labo emdlalweni. Siyambonga ngokuzinikela kwakhe,” kutsho uLanga.
Imbali kaMalunga kunguqu kuleli ibanzi. Wasungula iqembu leSizimisele ngo-1995 eLobengula West, wakhethwa ukuba ngumgcinisikhwama we-Women Football Bulawayo, wasuka lapho eqansa ngezikhundla zobukhokheli waze wahlonitshwa ngokuba lilunga leZifa.
Inengi koBulawayo limazela kuHighlanders lapho akade elilunga leHighlanders Royal Queens.
