uMthunywa
Intatheli kaMthunywa
ABALANDELI boqobo bomdlalo kanobhutshuzwayo kuleli bazakwamukela umnyaka omutsha ngenhliziyo ezidabukileyo kulandela ukusweleka kwengcitshi yomdlali uRichard “Dabuka Express” Choruma.
UChoruma ubhubhele elizweni leSouth Africa kuliviki, eleminyaka yokuzalwa engu-42, kulandela ukugula okwesikhathi esifitshane.
Wazakhela udumo edlalela iqembu elikhulu leHighlanders okwenza wabizwa kuqembu lakumaWarriors.
Kukhale abadlali kwakhala labalandeli benguqu ngokuzwa umbiko wokudlula kukaChoruma.
UChoruma ubekhankasela ukuvuselelwa kwenhlelo zokufundisa abasakhulayo inguqu. Ubonakele encedisana lamakolitshi lezikolo ezimbalwa koBulawayo ekhuthaza ithalenta elisakhulayo.
UFortune “Fokoza” Ncube ongomunye wabangane, ubike ukuba yena loChoruma manengi amacebo ababelawo kwezebhizimusi lenguqu.
“Ngidabukile Dabuka. Besilenhlelo ezinengi sisonke, manje khathesi ngubani ozangicebisa,” nguFokoza lo.
UDazzy Kapenya, owayengukaputeni wequla labadlali ababayinsika yokuphakama kweHighlanders uthe ukufa kukaChoruma kuyamethusa.
“Ngizwa sengathi ngiyaphupha.”
Udumo lukaChoruma lwavutha lwaze lwathinta intatheli labasakazi bezemidlalo kurediyo lakumabonakude.
UDensen Kulube, ingcitshi yomsakazo kuSkyz Metro uthe akula ozedlula ithalenta likaChoruma.
“Vele sengathi ngiyambona egijima ekhangele eMpilo ihlasela iBhoso, ezikaMagebhula, wayegijima hatshi okohlamvu kodwa wayengadinwa. Inkabankundla ngeke ibelabadlali abafana laye, uGidiza loNkonjera.
URichard Choruma ungene kuHighlanders ngo-2000. Wanqoba inkezo zeligi kathathu ngo-2000, 2001 lo-2002.
Kulandela ukulidlala kuhle yonke iminyaka le, uChoruma wathola izicoco eqenjini kanye lokukhethwa ukuba ngomunye wabadlali abaphezulu kuzicoco zama-Soccer Star of the Year ngesizini ka-2001.
Wahlohla amabhola alitshumi alesithupha kodwa wenelisa ukuncedisa ukuhlohlwa kwamabhola ayedlula ikhulu kuBosso.
