
Ethel Ncube
ZIYIKHALELE enye indoda yakoBulawayo kulandela ukubanjwa ngempelaviki ku-Sub-station yamagetsi eBelmont itshontsha intambo lezi.
URaymond Dhliwayo oleminyaka engu-33 yokuzalwa ubanjwe elamasaka angu-10 lezikhwama ezimbili zilentambo zamagetsi mhlaka 7 kuyonale inyanga.
Kubikwa uhlangothi lwamapholisa lwe-CID Homicide lwezwa udletshana lokuba kulabantu asebehluphile ngokutshontsha intambo zamagetsi endaweni le.
Amapholisa la kazange aphozise amaseko, ahle aqonda khona bathi befika bathola imota yohlobo lweHonda Fit imile khonapho ilamadoda amathathu phakathi.
Kubikwa abetheswacala bathi bethi mehlo suka bebona amapholisa bangena iganga babaleka kodwa benelisa ukubamba oyedwa.
Sebembambile baqonda laye emoteni bavula bathola amasaka alitshumi kunye lezikhwama ezimbili kugcwele intambo zamagetsi wahle wabotshwa.
UMthunywa uxhumane lesikhulumi samapholisa koBulawayo uInspector Abednico Ncube uveze ukuba udaba olunje solufikile endlebeni zabo.
“Sixwayisa bonke abatshontsha intambo zamagetsi ukuthi bengaqhubeka besenza umkhuba lo bazacina sebesejele.
“Sithanda ukubonga uzulu ngokusincweba indlebe ngalabo abatshontshayo. Sifisa ukubakhuthaza ukuthi baqhubeke besazisa ngalokhu abayabe bekusola ukuze njengamapholisa sichwayisise.
“Sicela njalo ongabe esazi ngamadoda amabili athi uTwoboy Tafandiani loMunyaradzi okungasatholakalanga isibongo sakhe, azise amapholisa aseduzane laye,” kuphetha uInsp Ncube.