Uncategorized

Ubanjwa ethengisa inyama yenkomo etshontshiweyo

14 Sep, 2023 - 00:09 0 Views
Ubanjwa ethengisa inyama yenkomo etshontshiweyo

uMthunywa

Thokozile Mbedzi

ZILOKHE zibabaza izakhamizi zeCowdary Park koBulawayo ngemva kokuba amanye amadoda ebanjwe xhaka ngempelaviki elamabhakede enyama yenkomo etshontshiweyo.

Kubikwa uNobukhosi Ndlovu oleminyaka engu-39 ubethengisa inyama entshontshiweyo okwacina kuveza uNhlanhla Mpofu oleminyaka engu-24 lo Reason Mathe oleminyaka engu-30.

Ekhuluma lentatheli kaMthunywa uNkosazana Dalubuhle Sibindi uthe lokhe bemangele ngesenzo sabathathu laba abatshontsha inkomo zabantu bezothengisela uzulu.

“Silesithuli silapha abathathu laba batshontshe inkomo babulala bazothengisa lapha elokitshini lethu. Njengezakhamizi siqale sibuzana ukuthi inyama le ivela ngaphi kodwa uNdlovu wathi ebuzwa wathi uyithenge eZuzinyama Butchery eqamba amanga.

“Lokhu kwenze izakhamizi zahle zabikela amapholisa ngodaba lolu ngoba zingazwisisi ukuthi inyama ibivela ngaphi,” kulandisa uNkszn Sibindi.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini yabo.

“Udaba lwenina ebelithengisela abantu inyama eCowdray Park solufikile ehofisini yethu.

“Uzulu uthe sebone uNdlovu ethengisa inyama wadingisisa ukuba inyama ababathengisela yona kambe ingabe ivela ngaphi lakanye bambuza yena wathi uyithenge e-butcher yakoZuzinyama yena eqamba amanga.

“Amapholisa athe esephenyisisa wasechaza ukuthi inyama uyithole emadodeni amabili uNhlanhla lo Reason bona abathe bebuzwa bavuma ukuba batshontshe inkomo eDelva Farm umnikazi wayo uleminyaka engu-57 wasedingwa ngamapholisa asembikela ngodaba lolu,” kuchaza uInsp Ncube.

Umnikazi wenkomo uthe inkomo yakhe ibibiza iUS$250 njalo kutholakale inyama yeUS$80.

“Sithanda ukubonga ukusebenzelana kuhle lozulu sikhuthaza abantu ukuthi baqhubeke besebenzisana ndawonye lathi ukuze senqabele amacala.

“Njengamapholisa sixwayisa uzulu ukuba angabothenga inyama ezithengiswa emigwaqweni ngoba zifaka impilo zabo engozini yokutholakala belempahla etshontshiweyo.

“Uzulu ulakho futhi ukuhlaselwa yimikhuhlane ngokuthenga inyama emgwaqweni ngoba kwezinye izikhathi kuyabe kuzinkomo ezibulewe yimikhuhlane eyingozi,” kuphetha uInsp Ncube.

Share This:

Sponsored Links

Survey


We value your opinion! Take a moment to complete our survey

This will close in 20 seconds