Ethel Ncube
KWEHLE ifu elimnyama elokitshini leMbizo eKwekwe ngemva kokuba elinye inina life ngemva kokutshaywa ngamagetsi ngesikhathi lizama ukuvula impompi yamanzi ligeza.
Inina leli, uTinashe Nyika wehlelwe ngamashwa la ngoMgqibelo ntambama.
UMthunywa uzwe ukuthi uNyika wangena esambuzini esiyageza uthe ezama ukuvula impompi wezwakala esehlaba umkhosi esetshaywe ngamagetsi.
Kuzwakale ukuthi uyise uMnumzana Joshua Nyika wamgijimisela esibhedlela lapho athe efika bathi usedlile emhlabeni.
Ekhuluma lentatheli omunye wezakhamizi zakule indawo uNkosazana Mary Moyo uveze ukuba kukhanya bekulohlupho emagetsini.
“Kubuhlungu ukutshonelwa ngumntwana. Kukhanya intambo zamageti zibe lohlupho zithintane lempompi zamanzi yikho okungabe kubangele ukuthi athi ebamba impompi atshaywe ngamagetsi,” kutsho uNkszn Moyo.
Intatheli ixhumane lesikhulumi samapholisa esabelweni seNkabazwe uInspector Emmanuel Mahoko othe sebamukele udaba lolu.
“Sichwayisisa ngodaba lokufa lwenina le Kwekwe elitshaywe ngamagetsi ngesikhathi ligeza.
“Samukele umbiko wokufa wenina elitshaywe ngamagetsi. Kukhanya intambo zamagetsi lezamanzi besezihlangene.
“Kungakho sikhuthaza uzulu ukuba nxa amagetsi eselohlupho kumbe intambo zamagetsi sezikhanya phandle badinge umuntu ololwazi ngamagetsi ukuthi alungise ukuze umphakathi uvikeleke emagetsini,” kuphetha ulnsp Mahoko