uMthunywa
SEZIQALA ukukhanya izibane kumdlali weReal Madrid uGareth Bale, okuvela indaba ezithi angase ahlale kuleli iqembu eliphekwa ngu-Zinedine Zidane.
Abalandeli beMadrid abakakholwa ukuthi engadlala kuhle lumdlali ngenxa yokulimala njalo lokukhitshwa kwembiko yokuthi uzochithwa kuleliqembu.
UBale (30) ubesehlelweni lwabadlali abathengiswayo kuMadrid ekupheleni kwesizini edluleyo kodwa keehlula.
Isikhwitshikhwitshi somgadli lesi besikhangelwa lokuthi siye eBeijing Guoan edlala eChina, iqembu ebelizimisele ukumholela imali engatsho lutho, okuyinto ayinqabileyo umongameli weMadrid, uFlorentino Perez.
Amanye amaqembu okubikwa ukuthi abefuna umdlali lo, yiManchester United leBayern Munich, aselethuba kuzo nanko lewindi lokuthengiswa kwabadlali livalwa mhlaka 2 kuMpandula.
Okufakazela ukuthi seziqala ukumkhanyela izinto uBale, yindlela adlala labanye ngayo kuMadrid uThibaut Courtois loCasemiro. Kubikwa laba batshengisele ukusekela isinqumo sikaZidane sokumqalisa lumdlali waseWales.
Kumangale bonke abantu uBale eqala emdlalweni weLa Liga abehlule kuwo yiCelta Vigo nge 3-1 ngempelasonto.
“UBale ungumdlali obalulekileyo futhi ube lomdlalo omuhle ngoMgqibelo. Siyamthanda singabadlali beqembu futhi kubalulekile ukuthi adlaliswe,” kutsho uCourtois.
“UBale usethole izicoco ezinengi edlala eqenjini. Usehlohle amabhola amanengi emdlalweni kanti siyamhlonipha kakhulu. Ungumdlali ophezulu njalo ubalulekile eqenjini lethu,” kuchaza uCasemiro.
Ukuhlutshwa yikulimala kumasizini adluleyo, kwenze uBale walahlekelwa ngumgqigqo omuhle ayefike lawo kuMadrid esuka kuTottenham Hotspur e-England.
Ngesizini edluleyo utshaye amabhola angu-14 entanjeni.
Ukulimala kukaHazard, othengwe kuChelsea, yikho okuvulele uBale ithuba lokuzigqamisa kubalandeli beMadrid ngokuphakamisa iqembu eliqede isizini edlule lilambatha.
UZidane useke waveza ukuthi uzamsebenzisa lumdlali kulisizini, okuyisimemezelo esatshaqisa abanengi.
Ngaphandle kukaBale, omunye umdlali obengekho enhlelweni zalumqeqetshi, uJames Rodriguez laye angahle abe lilunga elibalulekileyo leqembu kulisizini njengoba iMadrid ihluleke yancama ukuthola umdlali kunombolo 10 omutsha. — Ubulembu
