Uncategorized

U sane olulenyanga ezingu-7 lutshela endlini

17 May, 2024 - 14:05 0 Views
U sane olulenyanga ezingu-7 lutshela endlini uInspector Emanuel Mahoko

uMthunywa

Ethel Ncube

KULENINA leMvuma elibalisa lingaqedi ngemva kokuba litshiye abantwana belele endlini ekuphendukeni kwalo lathola indlu akade belele kuyo isilumathe umlilo okubangele ukuthi usane olulenyanga eziyisikhombisa lutshele phakathi.

UDeliwe Mapfumo oleminyaka yokuzalwa engu-32 kubikwa waphuma ekuseni esiyakukha amanzi watshiya abantwabakhe ababili oleminyaka emithathu lolenyanga eziyisikhombisa belele ngokusweleka kwenhlanhla indlu yasilumatha umlilo.

Kuvele ukuthi wathi ebucwadlana wananzelela ukuthi indlu atshiye abantwana belele kuyo isisitsha wagijima ekufikeni wafica omunye umakhelwane evele esezama ukucitsha umlilo.

Kubikwa benelisa ukukhipha umntwana oyedwa oleminyaka emithathu kodwa esetshile kakubi kukanti lo omunye wahle wafela phakathi.

Kusenjalo kulenye imuli yeMberengwa layo eyalumathiselwa indlu ilele kwedlula uTapiwa Matsheza oleminyaka engu-21 yokuzalwa.

Kuzwakale ukuba uMnumzana Isaac Matsheza oleminyaka engu-71 yokuzalwa wayelele endlini yakhe yokulala lomntanakhe uTapiwa Matsheza oleminyaka engu-21 yokuzalwa, owayevela etshwaleni. Phakathi kobusuku kubikwa kulomuntu owafika walumathisa indlu ababelele kuyo.

U-Isaac wathi esizwa indlu isitsha wazama ukuvusa umntanakhe ukuba baphume kodwa njengomuntu owayephandliwe wehluleka ukuvuka, uIsaac wenelisa ukuphuma kodwa laye waba lamanxeba okutsha.

Isikhulumi samapholisa eMidlands uInspector Emmanuel Mahoko uqinisekise ngezehlakalo lezi zombili.

“Indaba zabantu ababili abadlule ngengozi zomlilo zifikile emapholiseni sisachwayisisa ngazo. UIsaac Matsheza ulalisiwe esibhedlela seGwanda lapho elatshwa khona,” kuphetha uInsp Mahoko.

Share This:

Sponsored Links

Survey


We value your opinion! Take a moment to complete our survey

This will close in 20 seconds