uMthunywa
Mkhululi Ncube
Ngiyeza eKhaya!
La ngamazwi ka-Everton Mlalazi umculi wengoma zokholo ozakuba lomkhosi wakhe wokuqala koBulawayo lapho azabe ethakazelela njalo usuku lwakhe lokuzalwa ngoMgqibelo ntambama eZimbabwe International Trade Fair.
Kukhangelelwe ukuphakama uphahla njengoba abaculi abehlukeneyo ababalisa uMkhululi Bhebhe loTakesure Zama abahlabela bekweleSouth Africa okwamanje, uMai Mwamuka, Vusa Mangena, Pastor Barak, Lorraine Maplanka loJonah Chivasa bekhangelelwe ukubambisana indima yokudumisa loMlalazi.
UMlalazi ocula esesigodlweni eHarare wazalelwa eNyamandlovu ngakho uthi koBulawayo kusekhaya.
“Ngokwakuqala ukuthi ngizohlabela ekhaya koBulawayo ngakho ngiyajabula kakhulu ukuzohlangana labantu bakithi ngibanxusa bonke ukuthi baze ngobunengi babo sizodumisa sindawonye.
Zimbabwe International Trade Fair.
“Mina ngazalewa eNyamandlovu ngakhulela eGweru kodwa khathesi ngokosemebenzi ngiseHarare. Kulo umkhosi injongo yikudumisa lokubonga uSomandla,” kutsho uMlalazi.
“Kubandla engikhonza ngikulo eleSeventh Day Adventist Church kuzabe kule-Focus Accapella leRevealed okungamaqembu engiwathandayo njalo athandwa ngabantu abanengi kakhulu. Sizabe sithe gwaqa kuHall 4 khona eZITF kusukela ngo 5 ntambama,” kutsho uMlalazi.
Vusa Mangena
UMlalazi wathwasa kwezomculo ngo2020 lapho akhipha indlikizane yengoma ethi Uyingcwele eyaduma kakhulu ngemva kokudlalwa kumisakazo yakuleli.
Ngemva kwalokho wahlanganyela lomculi wakwele South Africa uBenjamin Dube bakhipha i-albhamu ethi Mwari Haashanduki elengoma ezathakazelelwa ngabanengi njalo zangena kunhlelo zengoma zokholo kumisakazo yakuleli.
