uMthunywa
Yintatheli kaMthunywa
AKULA mqeqetshi wenguqu ongafuni ukuba lomdlali olesiphiwo somdlalo njengoElvis Moyo, kutsho umqeqetshi weChicken Inn uJoey Antipas.
Umqeqetshi lo ukhulume kanje esithi uyasuthiseka ngemva kokuhlolisisa umdlali lo obegijima labanye abadlali ngesikhathi amaGamecocks elolonga kweyinye inkundla koBulawayo.
Iphephandaba likazulu liphethe udletshana lokuthi uMoyo uzakuba ngumdlali weChicken Inn ngoNtulikazi.
UMoyo wayedlalela iChippa United ngesizini ka-2020.
U-Antipas loba engazange afune ukutsho okunengi, ubike ukuba ukhangelele ukuthi uMoyo abekuqembu lakhe.
“Lo ngumdlali ofunwa yibo bonke abaqeqetshi. Liqiniso sibili ukuthi uElvis Moyo ulolonga lathi. Okwamanje ulolonga engumdlali ozimele yedwa kodwa ngikhangelele ukuthi sihlale laye phansi asayine eqenjini nxa iwindi lokuthengiswa kwabadlali lingavulwa,” kutsho uAntipas.
Kusenjalo, iChicken Inn ilokhe idinga iqhinga lokuthi ibengekhokhelayo kuqula lika-B kunkezo yeChibuku Super.
IChicken Inn ingena kuhlandla lesithathu lomkhankaso wenkezo le kumdlalo wayo leBulawayo Chiefs. Abafana baka-Antipas bamisane leHighlanders ngemiklomelo emine phezulu kwengalane yequla lamaqembu akoBulawayo.
IBulawayo Chiefs leBulawayo City ziphansi ziphethe umklomelo owodwa. Umdlalo weChicken Inn leBulawayo Chiefs lo uzabaluleka ngoba yiwo ozatshengisa ibanga elizahanjwa ngamaqembu amabili la. Ukunqotshwa kweChiefs, kutsho ukuba iyabe isiyehlise amathuba ayo wokuthi aqhubekele phambili. Ukunqoba kwayo, kuzayifaka ethubeni elihle lokuphutsha isibanga samaqoqo.
Ebuzwa ngomdlalo lo, uAntipas uthe uyayihlonipha iChiefs.
“Sikhuluma ngeqembu engilihlonipha kakhulu ngokwenelisa ukudlala ibhola elilula elihlelwe phansi. Akusithimu yokudelela loba nini.
UThulani Sibanda okhuza iBulawayo Chiefs uthe ulolongele ukuthi ayiqethule iChicken Inn.
“Isiqokoqela yikudinga ukunqoba. Umdlalo lo siwubona njengayo yonke imidlalo,” kutsho uSibanda.
Abafana bakaSibanda baqede umdlalo wabo leBulawayo City kungutshiki lobhanqa ka 2-2 ngempelaviki edluleyo.
Kumdlalo wakuqala, iBulawayo Chiefs yanqotshwa yi Highlanders 1-0.
