uMthunywa
Nkosilathi Sibanda
KUMDLALO wenguqu, inombolo aziqambi amanga!
Unozinti weHighlanders uAriel Sibanda uqede imidlalo elitshumi lasikhombisa kungela oyenelisa ukumhlohla, okuyikho okumenza athole isicoco sikanozinti owazi ukuvimba kulabo bonke elizweni.
Lisiyatshona kunina lamhlanje, ilizwe lizakwazi ukuthi yibaphi abadlali abangene kukhalenda yeCastle Lager ka-2019. Ukhetho lwabadlali abenze kuhle luqhutshwa lamuhla, kuhlelo oluqoqelwe eHarare lapho okuzahlanganiswa amakhanda phakathi kwentatheli zemidlalo, abaqeqetshi bamathimu wonke akuPSL labo kaputeni bamaqembu.
Unozinti weBosso kuzamele abekhona kuluhlu lwabadlali laba.
Iphephandaba likazulu likubona kufanele ukuthi uSibanda, odume ngelithi ‘uMangoye’ angene kuqula labadlali abazabizwa njengengcitshi ngenxa yokuthi ubenguye owenelise ukugcina igedi lingahlaselwa.
Kubalandeli benguqu, akuthandabuzwa ukuthi uSibanda wayisiza iHighlanders kumidlalo eminengi lapho eyayizahlohlwa amabhola amanengi. Unozinti lo wavimba waze waphumelela ekuthi aphethe isizini elerekhodi yokuvala amanethi into engazange yenziwe ngabanye onozinti.
Kubadlali beTshilamoya, unozinti lo nguye yedwa ophume enze kahle loba bekhona abasekeli bomdlalo webhola abakhankasela ukuthi kuvotelwe loGabriel Nyoni.
UNyoni ngomunye wabadlali ababalelwe kulabo abalobungcintshi kulandela ukuhlohla kwakhe amabhola ayisithupha. Ikhasi lobulembu beTwitter kuHighlanders luncoma umsebenzi walumdlali ophethe engukaputeni weqembu.
Lomgcinisihlalo weqembu uNhlanhla ‘Bahlangene’ Dube ukubeke mgceke ukuthi uNyoni ubeyinsika yeqembu.
“Udlale kahle ukaputeni wethu uGabriel Nyoni ngokuhlohla amabhola ayisithupha lokuncedisa ukuhlohlwa kwamabhola apaswe nguye okwesitshiya galolunye…,” kutsho uDube.
Ngemva kokuhlolisisa kubalandeli benguqu ezitaledeni zakoBulawayo kuliviki, umdlali olakho ukungena kukhalenda ngu-Ariel Sibanda. Ukaputeni weqembu engabe enze kuhle kodwa umncintiswano akhangelane lawo umkhulu ngoba bakhona abaphuma kwamanye amaqembu abenze okwedlula okwakhe.
Ukuvimba kukaSibanda akulangitsho ongakuphikisa ngoba kusekelwa zinombolo.
Ukuxegisa kwemvimbi zeqembu kuBosso kumidlalo edluleyo bekutshiya lunozinti esegcekeni kodwa wenelise ukudanisa izitha ngokuvimba ibhola entanjeni.
Iphephandaba likazulu lithole ithuba lokuxoxa lonozinti lo obike ukuba uzibona esengenile kukhalenda.
“Ngidlale kuhle kulisizini, lami ngizibonele ukuthi kukhona okuhle engikwenzileyo,” kutsho lumdlali ngokuzethemba okukhulu.
“Angizitshayi isifuba ngokubamba kwami kodwa ngeminyaka esengiyiqedile ngingunozinti, kuba lula ukuthi sengithole inhlonipho ephezulu kuleliqembu lokhe ngaqala ukulivimbela igedi kusukela ngisesengumfana omncinyane.”
Ngesizini edluleyo uSibanda ubengumdlali obeyingcitshi ukwedlula bonke. Okunye okunikeze umdlali lo inhlonipho yikuthi wenelisa ukubamba imbekwa eminengi kumidlalo yeligi kanye lakumkhankaso wenkezo ezibalisa iZNA Charity leChibuku Super.
“Ngibonga abadlali beqembu bonke labasekeli bethu ngokuqeda isizini kuhle,” kutsho uSibanda.
Kusenjalo, izazi zenguqu ezidibane eHarare zizaveza emphakathini ukuthi zivotele uphi umdlali.
