uMthunywa
Intatheli KaMthunywa
KUYAVELA ukuthi uJoey Antipas ukhwabitha ukusebenza labadlali beHighlanders lokuthi uyafisa ukuba kuleliqembu.
Ingabe iqine saka, ilabadlali abasacathula abalobungcitshi enyaweni iHighlanders, kodwa ukukhethwa kwabadlali bayo abahlanu kuqembu lesizwe elomqhudelwano weAfrican Championships (Chan), kutsho okunengi ngomqeqetshi.
U-Antipas wakubika emphakathini ukuthi umdlali weBosso uMcClive Phiri umthinta kwamancane ngoba esithi akula mdlali owenelisa ukulikhaba njengaye elizweni lonke.
Abanye abadlali beHighlanders abakhethwe ngu-Antipas kumaWarriors babalisa ukaputeni uAriel Sibanda, uPeter Muduhwa, umsekeli kakaputeni uNqobizitha Masuku lengcitshi yokuhlohla uPrince Dube.
Umgcinisihlalo weHighlanders uKenneth Mhlophe uyajabula ngokuthi ithalenta leqembu liyabonakala.
“Okuhle kuyabukwa ngakho umqeqetshi wamaWarriors wananzelela ukuthi iHighlanders ilabadlali abalaziyo ibhola. Umbono kamqeqetshi uyasikhukhumeza njengeqembu. Sifisela ithimu yesizwe inhlanhla kumkhankaso wayo wenkezo yeAfrican Championships,” kutsho uMhlophe.
AmaWarriors azaqhubeka kumqhudelwano weChan mhlaka 20 kulinyanga lapho azadlala khona leLesotho. Isizwe sivakatshela edolobheni leMaseru sikhokhela ngemva kokunqoba 3-1. Umdlali weHighlanders uPrince Dube wahlohla amabili.
U-Antipas utshele intatheli ukuba uzafisa ukulungiselela lumdlalo kusukela mhlaka 13.
Iqembu lamaWarriors eliku-Chan:
Onozinti: Simbarashe Chinani (Dynamos) Ariel Sibanda (Highlanders) Nelson Chadya (Ngezi Platinum Stars)
Imvimbi: Partson Jaure (Manica Diamonds) Peter Muduwa (Highlanders) Frank Mukarati (Ngezi Platinum Stars) Ian Nekati (ZPC Kariba) MacClive Phiri (Highlanders) Xolani Ndlovu (Chicken Inn) Nomore Chinyerere (Hwange)
Abasesiswini: Kelvin Madzongwe (FC Platinum) Tichaona Chipunza (Chicken Inn) Nqobizitha Masuku (Highlanders) Sipho Ndlovu (Chicken Inn) Ralph Kawondera (Triangle United) Joel Ngodzo (Caps United) Juan Mutudza (Herentals) Valentine Kadonzvo (Chicken Inn) Donald Teguru (Ngezi Platinum Stars) Phenias Bamusi (Caps United) Leeroy Mavunga (Yadah Stars) Wellington Taderera (Black Rhinos)
Abagadli: Prince Dube (Highlanders) Obriel Chirinda (Chicken Inn) Evans Katema (Dynamos)
