uMthunywa
Nkosilathi Sibanda
PHO iECD kaMadinda Ndlovu izawumela na umlilo weHwange ovutha kangaka?
Lo ngomunye wemibuzo eminengi ehatanisa amakhanda abalandeli beHighlanders asebedinge baswela ukuthi yisitha bani esihlasele iqembu labo elehluleka ukunqoba.
IHighlanders inxusa iHwange eMagumeni kuliviki lesithupha kumaqembu kanobhutshuzwayo weCastle Lager.
Abathandi beHighlanders bangena impelaviki bedinga ukuthokoziswa okwakuqala lokhe isizini yaqalayo. Isibatshile imimoya iTshilamoya nanko kwehlula ukuthi ihlohle, inqobe njalo kumidlalo edluleyo.
Umdlalo lo uzadonsa amehlo kumqeqetshi uMadinda Ndlovu laye oselinde wahawula ukuthi abadlali bakhe baphawule umdlalo ozaletha imiklomelo.
Lomsebenzi wakhe usulengile, okuyinto ezafunwa ngabanengi babasekeli beqembu nxa enganqotshwa ngeSonto emini.
Akukho lula ukuhlangana leqembu eselivutha kumkhankaso weligi elifana leHwange. Abafana bemalahleni sebenqotshwe kanye kuphela njalo bandiza kunombolo yesibili kulogu ngemiklomelo engu-12.
Izethekeli ziphethe imbali etshisayo okokuthi nxa uMadinda engekela ukukhuza abadlali bakhe, iqembu lingaphuma eBarbourfields litshile ngokuhlohlwa.
Ukutshisa kweHwange sekuze kwathinta loMgcinisihlalo weHighlanders uKenneth Mhlophe osecele ukubekezela kubalandeli labasekeli beqembu lakhe.
“Lesi yisikhathi esinzima eqenjini. Akujwayelekanga ukuthi iqembu elikhulu kangaka linganqobi emidlalweni emihlanu yokuvula iligi ilandelana.
“Loba kunje, ngiyazi ukuthi kuzadlula. Iyeza imidlalo yenjabulo. Ngincenga bonke abangaphansi kwemuli yeHighlanders ukuthi babekezele. Abaqeqetshi labadlali bayalolonga ukuze basinikeze imiklomelo,” kutsho uMhlophe ekhuluma lephephandaba likazulu.
Lakanye izabuya ivutha ngamalahle iHwange nanko lomqeqetshi wayo uNation Dube ubike ukuba akwaziyo yikunqoba kuphela.
“Kithi eHwange esikwaziyo yikunqoba. Asikhethi iqembu ngoba silande ukuzodlalela ukunqoba kulinguqu. Umdlalo wethu leHighlanders siwulungiselele saphelela ngoba asideleli. Kungaba kuhle ukuphetha umdlalo silemiklomelo yonke,” kutsho lumqeqetshi ngesikhathi ebika ukuba useqala elinye ihlandla lokulolongela umdlalo phakathi kwaliviki.
Kusenjalo ziqhubeka zibheda enkambeni yeBulawayo Chiefs ebhaxabulwe 4-1 yiCaps United. Labo makhelwane iChicken Inn idliwe 1-0 yiFC Platinum.
Amakhosi azadinga ukukhululeka mhla edibana leYadah eLuveve ngoMgqibelo. Umdlalo lo uzatshengisa ukuthi indlela isavulekile kuthalenta leBulawayo Chiefs eselehlelwe ngumnyama wokungaliboni igedi.
NgoMgqibelo:
-Bulawayo Chiefs v Yadah (Luveve)
-Ngezi Platinum v Telone (Baobab)
-Black Rhinos v Triangle United (National Sports)
-FC Platinum v Herentals (Mandava)
NgeSonto:
-Dynamos v ZPC Kariba (Rufaro),
-Manica Diamonds v Chicken Inn (Gibbo),
-Chapungu v Mushowani (Mandava),
-Highlanders v Hwange (Barbourfieds),
-Caps United v Harare City (National Sports)
