Tohiya tilimu Jwanzibeli 2

09 Mar, 2017 - 00:03 0 Views

uMthunywa

Tina Success Mlalazi
KUN’UMBA inogala Debar nenzekulu uwe kuHilbrow kowhakala hhoba yerediyo inozanigwa pehhugwi tjoselele, ndi Allen unozangwa unowhakala eti “isimomondiya sami” ngeno konhuwhilila hanyanisi kana nlume umile patofu ndiye unodzipisa. MuGoli ungagala nenhu unohinga ebuya busiku iwe ubuya kutjabona nobhika ukabona mayi beti layi.

Ndzidzi ndiye ukudzihali, kusi kuti unoziba bhika, koga ngobe etanga swika kun’umba. Debar unoswika zwe pakati kwebusiku, atodla ke woyu ape ehhaa unogozwa hha eta komitji in’ompela yetiyi elalazwe.

Ndzidzi unobhika enonoka mwaza etila kuti basikana banogala mun’umba yenyaluluka bewuwane etji mukhitji, kunatjimwe tjitehlanana banotjidana beti ndiSlender, koga lezwaga ndiSenzile Tshuma, atotjiminyila mate ngono unotjihla, koga atowhisisa ape engalala asawunti tjazi!

Wakatjenjela ke woyu nsikana wakabona kuti bhoyi tjetji tjowuda ngono tjohla leba, ape ewuwana ebhika unoswika ewuntjidza ekobe edada zwe naye. Unoda dada zwakayipa, ipapo-ke kobekuti efe mbisana.

“Kati yeEnthen wabeporofiti,” kobhuzwa Luzibo beliku-salon iye, banoda gala belipapa bayisana banjinji bekubuKalanga, kene banoda Luzibo senkulu wenkwinya wabo kene banobe bewohohhela saku kugala kulihhele banana banjinji bakanaka nebakayipa, bahaba nebatema, bewolukwa mavudzi.

“Ye, hazwadzi nokutola poni ikoko?’’ ndiEnthen ehandula nembuzo. “Heyi usizwibhuzwise eyo mikaka yawati itengwe naJunior-ke? He-e?’’ Banowunziba bose bakwinya baJunior kuti apa uhaka whanana naye leba lebeswa. ‘‘Hayi kuti ndiporofiti ndandipindisabo tjandanda bonisiwa’’. Unobona kutilamba kungamusa buhongola kuhazwadzi. ‘‘Mukabe munyepa zwenyu muta zwinhu zwezana atingawhanane mozibabo. Ndomupa mali koga nhingo unohakiwa awutolanda nhu eligele. Towhanana!’’ Kene beti bomayi bakabasiya kanyi banonyepa Luzibo uyapo.

Masikati kutolo tjezwodliwa bahingi babhizi bano baakanyila madekwana kana kohingwa kwazo. Tabuya wabhuda wanohaka zwisipo mutolo, kene esipo ngeno mukhitji konda zubanana kana Debar wabe nemakole ehinga ipapa unoziba kose kunobe kwakafanila kutiwe, etjidziwa naLastman wakaNdlovu mfowabo ndimalayitja tjino zwibgwa kuBuKalanga,  Bradley.

Thobe na Lydie bakabhatikana bo banobaakanya matafula nedzinjigwana nemaforogwe, nasi kene bakabhata ipi atizi banobonakala beseka bedza bephasulana, kuna banonyeyiwa ipapa. Debar hhiho likubanana ibaba. Wagala ebada koga kwemahhuba iyawa ungati kumbeli, tja anogwisa nemasimba ose hala un’ompela ngono kokona, Lydie wakasa mavudzi etjikhuwa ekolukiwa zwakanaka, nlomo wakasiwa penda haba, womba dzemaboko nemakumbo dzihaba bo apa wehanganya nezimbalo zwabo keti tjitema nebhulawuzi ntjena nehangu yedzi dzinazwitshitshino zwilefu.

Ha-a nobe ulinlume wakatini usingakubone naka kweNkalanga? Thobe iye mavudzi mafupi azotiwa tjimwe matematema iwo, whomba dzakapendewa nekutema eba ezwikwala nepenseli pehhugwi kwemeho nemunlomo wasa penda nhema. Atopedza tjekelela nasi Debar esapinda netjinyala ngobe azolinga tjaanota wakalinga zwe makharibe mabili.

Netjinolebwa naLast unobvuma koga atogala awha.

BoEnthen naJunior bapiwa mari bebe bebhuda belinga kuPan ndiko kwabanono haka zwiwatjo zwabo zwagala zwazwepela, kana kunaEnthen kohhala bo banobe behaka mitembezelo nebanobe baporofitiwa kutshipi banohha bohanganyisigwa kuwunli. Atenditi unohinga penda ngono kotongoti whu besanu bawana umwe n’hingo. Mari yabapiwa ikasala banonobheja bhola, banosolibhata gumwe lubaka.

Kalanga Language and Cultural Development Association
[email protected]

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds