uMthunywa
“KATI ye iwe Junior nonga utjilele tjini, muGoli kolagwa? Muka unohaka n’hingo he-e, ndokulela kukadza kukabelini? Yi? Muka.’’ NdiLuzibo hazwadzi yaJunior, unozibgwa nebuhongola, banowunziba bekati wakafuza mayi. Batatu kunamayi, ndiye whola etobegwa newetjilume unoyi Livingstone kukoti kologwe Rra Junior. Atowanana nehinga-ke woyu, usimbe! Nakanyi mayi bakabeleba bekabiga pasi.
“Ayi sisi balume, kutjimangwanana nemihingo yakhona akuna ndongomusigwa suli koga.’’ NdiJunior elambila mungubo. “Aa apawujali nonogala kunaLivy atizi saku nkadzi wakhona elitjobolo wali’’. “Ndomuka hazwadzi, ndokumbila mari nditenge makhandlela nenkaka.’’ “Makhandlela etani mugoli? Hi,’’ hazwadzi yatjenama. “Ndaka porofitiwa naEnthen hhulo tilikutji futho eti ndiwahake unondi tembezelisa nawo ndingule nonkaka ndowana n’hingo’’.
“Siyana nezwinu zwezana uhake n’hingo, ekakutembezelisa n’hingo unokulanda mun’umba ipapa?’’
Benyanyayidzane kwelubaka nyana kubva kuswika makhasitoma aLuzibo kana iye atohinga khuwa unoluka zwe mavudzi ngono unabanhu kwazo pela kwemedzi antoleba nowana banana betshambana patji n’umbana tjakabakiwa nemazenge woga (banoti mkhukhu muGoli), tja anohingila mutjili ntome kwen’umba yabanogala kuRiverpark muAlexandra nenun’una uwe Junior.
KuParkmore kunatolo tjinobhika zodliwa zwemakhuwa, tjohhala tjetji tolo kwazo kwazo ape kwabe madekwana, makhuwa sebanhu banamali dzabo kakale banoda dla kuhhe banohhala bewodla kafu tjayipapa. Tjozibwa tjetjitolo, wakadzibhata umwe nlumetate weNkalanga unoyi ndiTabuya Msindo. Ndiye wakalinga kuti kose konda zubanana, wake ebhika kwazo ngono makhuwa eba eti bukulu iye elinge babhiki nebatengesi bezodliwa zwapapa. Unozwida!
Mbala ungawutani? Banjinji basikana banoyemula kuti ebalezwe! Mota yaanonda nayo noti ndeyekhuwa, towha beti nekunzi uwe kaTjehanga hayi wakabaka, ndibo banhu banoloyegwa tjiyapo ibaba. Senhu unabunhu bahingi bapapa baKalanga boga ndiye wakabasa, bamwe ihhama dzidze. Kotengesa basikana babili bakanaka tjose, umwe unoyiLydie Nleya umwe ndiThobe Ngwenya. Ungababona batjimbala zwen’hingo nopela mate, Lydie untehlanana figa yakalizana mbili ekoba ntemanyana, butema wakadiligwa natatayi kukayi mayi banokhanya. Wale Thobe mbili upakati azokola, unokhanya nyana. Ngono banohinga nabo banolila bekati panlomo ngeno ah bakapiwa bana bebaKalanga, abatoleba marediyo!
Kudzihhali wakababhata igombalume lakavuna mayi ndembeleko msana waTshuma unoyi Debar. Makhuwa anosowundana apa aguta ewobhata luboko beboka zwikafu zwaanobe abhika, tsene kanyi kwabo beziba banobe betongowu zophisa bhika. Ndiye unobe akadiwa newumwe webanana babanohinga nabo ngono ekotjiba bose.
Waka eti ape enamwe eposa matama, hoyu apeti sudu esala eposa kuwumwe, bekozuwilana ndiko kwakawunlahisa, weengo balinga nengoni.
Koga banonyepa nkhwinya uwe umporofiti unolebeleka naye bekabandila nhlane, meya unayo tjoselele koga ungati ndeye banana, ndiEnthen-ke woyo.
Bakalalisa meho unobasungila bose atole tjithembu. Atoziba tja waanohaka bo woyu. Ndimatjiba zose.
