uMthunywa
NASI ihuba letsipi mangwanana,banhu bamuka ntolo bethama mihingo yakasiyana siyana bebvumilana newakati akuna tjinoha uligele kuhe kwelufu. Tolo nasi atjitohugwa, Debar wamukila ku Alex kuna Enthen kuna zwanohaka behanganyise bakwinya bantolo tjoselele, netsipa banotsipa bose ipapa muAlex. Enowana n’umba yabehhele banotigwa zwinu zwaka siyana siyana. Bebhude batigwa kungine bamwe.
“ Watjimela ubhadalise nlumewe banhu banohala zwingapa!”. Ndi Debar edadazwe. “ Nolebesa banhu baba banondimusa mangwanana kwazo ipapo antowana tjimwe”. Kana haba babili atebanhu bawungaphika nabo!
Banozuwa ngeno be pisa zwimbalo zwetsipi (ayina),Debar unozuwila nkwinya nekwe banana ba anohinga nabo nekuti atoziba eteni ngobe bose bakanaka kakale wakalebeleka nabo bose ndiko kwakawunhalilisa kuhe. Ndebo itjizipa kukokodze banhu pahe. Enthen eti bangine, babili umwe wakabhata luhaba. Begale pasi bebuyise, yezo ka! nti wazwitsa! Debar hatjina nlomo, wakongwa nedabila belezwewa nebakadzimayi bangina. NdiThobe unopelekedza mwana wabasekulu babe, balala besayizele luhaba gukuwa beba beti kuhini bemukile kumitembezelo.
“ Tshuma watjidza ukabepo hhama yangu mbula hangu tibige mwana maboko”.ndiEnthen atjipfigama. Eduse hangu Debar epfigame betembezele koga mawi elambe bhuda ……
KuSaloon kuhele nasi Luzibo atowana lubaka gwedla, kutsipi nasi ekangangwe, wabe netsipi natu dzose esingande.
Mihingo yegoli kotiwa tjini?. Junior iye apa usingazibe ungati unoluka bo! Unogala elipapa lubaka gunjinji, awungalemuhe kuti banhu bapapa unobabona kana unobe akatsinatila zwe munhala uwe kene unobe elimubhuku lebuso awungazibe kana kuna nekumwe kene koyi wasapu nowana nhu eseka nefoni sempengo! Zwinu zwemakhuwa!. Unobe akabalinga bose. Iye wabankanya wapedza walinda Enthen unopinda ewuntola bende kutsipi.
Kuti hazwadzi inotigwa zodliwa apa yakamaniwa nemihingo atogala akuziba ikoko, wale tsene kuliLivy. Livingstone unlume tate tjose unohinga tjose unonga hazwadzi iye mumasimba. Junior wakafanela ebhata dzisime ngobe nlumetate unowanana naLuzibo ungati unaswimbo yawakaba vukidzila mupfudze mumwedzi waZwita, n’ombe ungati dzabemile nemumo.
Bahisa mwana batjidziwa bekanda Debar abetjimumu, wawungati ihhuba lekutanga ebona Thobe kati babe nemimwedzi mitatu yose behinga bose. “ Kati nohla tembezela zwingapa mTshumeni? Ndabona watjitjenema tjenjela kwapela kwatini?”. Unowumbona ntja kuti wayesitji iye. “Hayi nobona banana bandinda tjakubudza nekwabo?”. “Bapi bawuno hinga nabo?” ebhuzwe bo Enthen. “E-e umwe wakhona ndiye woyu wawakambala bhulawuzi yepinki”. “Usijalo Tshuks ah! Ya unopisa phela mwana woya”. Kobva kuti wawa wumbona bo Enthen, endilembeli eti,” Ngono waletjelani kumbila lebeleka naye?”. “ Nkinga ekati wabe nenhu wahanosekesana naye”.
Beyibhate ndebo yaThobe bedze bekangangwe lubaka. Beyethusiwe naNdzidzi epinda ebatola. Azohana nje Ndzidzi nasi wakabulaya, unomwemwetela atopedza kene wabhata lotho atizi?.
Bebhude bepinde betola Junior belinge kutsipi. Atomba nasi Ndzidzi irediyo khasethi nekwayo! Mwali upedlo naye tjosele. Tjikulu tjawunhanisa nasi.
Kalanga Language and Cultural Development Association [email protected]
