uMthunywa
Ethel Ncube
INHLANGANISO yeMfelandawonye Livestock Production ikhuthaza abafuyileyo ukuba bathengise ezinye izifuyo ukuze benelise ukuthenga ukudla lemithi yezinye ezisalayo.
UMgcinisihlalo wenhlanganiso le, uMnumzana Sifiso Sibanda uthe abalimi kabathengise ezinye izifuyo ukuze zingacubi zonke njengoba sikhangelane lendlala.
UMnu Sibanda uthe endaweni ezinengi izifuyo kaziselakudla.
“Ngikhuluma nje izifuyo amahlanga seziwadle zabhoda ngale kwawo akuselalutho, utshani labo abukho.
“Kulendaba enzima yezifuyo kungakho sithanda ukukhuthaza abafuyileyo ukuthi baphungule imihlambi yabo kulokuthi inkomo zabo zife zonke zibulawa yindlala ngenxa yokuswela ukudla.
“Inkomo esezindala, inyumba kazithengiswe ukuze imali yakhona ithengele eziseleyo ukudla njalo zithole lemithi. UHulumende kasenelisi ukuthi anike abantu umuthi wokudibhisa ngakho asizenzeleni singabi ngamavila sithenge imithi inkomo zethu zidibhe zingabi lemikhaza ngoba iyabulala izifuyo,” kubika uMnu Sibanda.
Uqhubekele phambili echaza ukuba inotho yethu njengabansundu yeyeme ezifuyweni.
“Ngenkomo, imbuzi kanye lezimvu sinothe kakhulu kungakho-ke nxa silakho asikunakekeleni sikuphathe kuhle. Asinakekeleni izifuyo zethu ukuze sithi nxa sizisa emkambo sithole imali enengi.
“Nxa singathengisa izifuyo asithengeni ukudla okwaneleyo ukuze sifikise isikhathi sezulu lapho okumila khona utshani,” kuphetha uMnu Sibanda.
