uMthunywa
YiNtatheli kaMthunywa
ABALIMI abasebenzisa imali yabo abehluleka ukuthola izikwelede emabhanga sebexwayiswe ukuthi basebenzise ithuba lesigaba esihle sokulima sika2020/21 esivezwe ngababona ngezomumo womkhathi abe Meteorological Services Department (MSD), ukuthi bathengise ezinye izifuyo zabo ukuze benelise ukuthenga impahla yokulima.
UMkhokheli weZimbabwe Commercial Farmers’ Union uMnumzana Shadreck Makombe izolo uthe abalimi laba basesimeni esinzima ngoba kabalandlela yokuthola imali edingakalayo yokuthenga impahla yokulima kulandela ukusilela kwezulu okwaba khona kumnyaka ophelileyo okwabangela ukuthi bangatholi isivuno esihle sokuthengisa ngitsho lesabo esokudla lemuli zabo.
Uphinde njalo wanika abalimi abenelise ukuthola izikwelede emabhanga ingqobe yokuthi babe lomkhuba wokubhadala izikwelede nxa bengavuna bathengise izilimo zabo ngoba abanye babo kabasabolekwa izimali ngenxa yokwehluleka ukubhadala izikwelede.
UMnu Makombe uthe indlela yokulima yeNtwasa ifike ngesikhathi esiqondileyo ngoba abalimi abanengi sebelahlekelwe yizifuyo zokulima ngenxa yomkhuhlane we-January disease, obekusitsho ukuthi abalimi abanengi bebezathwala nzima ukulungiselela ukulima.
Njengoba isigaba salonyaka sithembisa ukuba lezulu, abalimi kumele balime izilimo ezisanhlamvu ezinengi kukanti labo abalima besebenzisa uhlelo lweNtwasa kumele bazame ukuqhelisa indawo yabo ukuze kuminyaka ezayo benelise ukubhadala izikwelede zabo kuHulumende baphinde basale njalo lesinye isivuno sokuthengisela iGrain Marketing Board (GMB) kanye lokuthuthukisa uhlonzi lwezilimo zabo ukuze bakhulise umthombo wemali, kutsho uMnu Makombe.
