uMthunywa
Ethel Ncube
INHLANGANISO ye-Agritex ikhuthaza abalimi abangakathengi inhlanyelo ukuba bathenge inhlanyelo ezilungele indawo zabo.
UMnumzana Thulani Dube ongumlimisi esabelweni Matabeleland North uveze ukuba ukubakwazi inhlanyelo elungele umhlabathi wakho kuqakathekile kakhulu njalo yikho okungenza athole isivuno esihle kumbe esiphansi. Ekhuluma lentatheli uMnu Dube uveze ukuba abalimi ababone ukuba inhlanyelo yabo ifanele indawo abalima bekuzo.
“Okokuqala balimi njengoba sesilungela ukulima lingaze lathenga inhlanyelo ezingelamabizo ngoba ngeke likwazi ukuthi ngumhlobo wuphi njalo ovuthwa ngemva kwesikhathi esinganani.
“Lingathenga inhlanyelo ezingelamabizo kuyenzeka ukuthi uthenge inhlanyelo elungele ukuyalinywa esidakeni wena uyifake emahlabathini usuvuna subona ungasatholanga isivuno obusikhangelele,” kubika uMnu Dube.
Uqhubekele phambili echaza ukuba nxa usiya esitolo kumele ufike ubatshele ukuthi ulima ngaphi kwendawo ukuze uthengiselwe inhlanyelo eqondileyo.
“Nxa ungafika esitolo esithengisa inhlanyelo kumele ucele ukubona abafundela ezokulima ube usubachasisela ngendawo lapho olima khona utsho lokutsho ukuthi ulima emahlabathini, kusibomvu kumbe esidakeni uzatsho ukuthi yiphi inhlanyelo efaneleyo.
“Lingenza njalo kuzenza lizitholele isivuno esiphezulu hatshi ukuthi ngemva kokusebenzisa imali lamandla uphinde ungavuni lutho.
“Nxa kumbe uzaphathisa inhlanyelo hamba kumlimisi oseduzane lawe umbuze ukuba inhlanyelo okumele uyithenge yiphi ubhale phansi iphepha umqhubele kumbe ufake ecingweni lakhe ukuze angakhohlwa nxa esethenga,” kuphetha uMnu Dube.
