Fungai Muderere
UMQEQETSHI weHighlanders FC, uBaltemar Brito, usehlonitshwe yikomithi ephethe ibhola lenyawo kuleli eyeZimbabwe Football Association (Zifa) Normalization Committee (NC), nanko usecelwe ukuthi akhuze iqembu lama-Warriors okwesikhatshana.
Umgcinisihlalo wekomithi le uLincoln Mutasa ngoLwesibili emini uthumele incwadi kuqembu leHighlanders esethula icelo sabo.
Encwadini le edindwe mhlaka 19 Mpandula, ikomithi yeZifa ithe:
“Ikomithi egxile ekulungiseni isimo seZifa lithanda ukucela imvumo yenu yokukhulumisana lesinye isisebenzi senu uBaltemar Brito Jose Oliveira ukuze abe ngumqeqetshi okwesikhatshana weqembu lesizwe. “Njengoba evezile ukuthi uqhatshwe ngokugcweleyo liqembu lenu, yingakho siyakhuleka ukuthi limkhulule azokwenza lumsebenzi,” kutsho incwadi le.
Ebuzwa ngalokhu, Umaqhuzu weHighlanders uRonald Moyo uvumile sibili ukuthi bayitholile incwadi le.
“Ngiyaqinisekisa ukuthi sithole incwadi evela kuZifa, efuna ukucela umqeqetshi wethu uBrito ukuthi abengumqeqetshi wamaWarriors okwesikhatshana,” kutsho uMoyo.
Ngokunjalo, kubikwa ikomithi yeZifa le iphezulu kokuxoxisana njalo labanye abaqeqetshi efuna ukuthi bakhuze iqembu lamantombazana eleMighty Warriors. Kubikwa ingxoxo lezi ziqalise ngoLwesibili.
Kuqula labaqeqetshi bamaWarriors kudingwa abantu abahlanu, kuthi kumaMighty Warriors kudingwa abathathu.
