uMthunywa
YiNtatheli kaMthunywa
SOKUFE njalo omunye umuntu koBulawayo kubangelwa lubhubhane lweCovid-19, phezulu kwalokho kulabantu abayisikhombisa asebebanjwe igcikwane leli.
Kusitatimende esikhitshwe lugatsha olubona ngezeMpilakahle kanye lokondliwa kuhle kwabantwana kubikwa kulendoda eleminyaka engu-49 ebulewe ngumkhuhlane lo koBulawayo.
Umbiko lo usukhuphule inani labantu asebetholakale beleCovid-19 kweleZimbabwe laya ku-574 kanye lembiko yokufa yaya kusikhombisa.
Kubikwa abane abatholakale belomkhuhlane lo kabalambali yokuvakatshela kwamanye amazwe, kukanti ababili ngabavele kweleSouth Africa kuthi oyedwa uvele kweleBotswana okuyikho okwenza kube labantu abayisikhombisa abatholakale beleCovid-19.
Ugatsha lwezeMpilakahle luveze ukuthi abathathu kulabo abangazange bavakatshele ndawo ngabalobudlelwane lesinye isigulane esatholakala silegcikwane leli, kukanti kusadingisiswa ngokuthi lo owesine angabe ewuthethe ngaphi.
“Silokudana ukwethula umbiko wendoda eleminyaka engu-49 ebhubhe esabelweni sakoBulawayo ngemva kokutholakala ileCovid-19. Umuyi ubeke wavakatshela kweleSouth Africa njalo ubeleminye imikhuhlane. Kulabantu abayisikhombisa abatholakale beleCovid-19 lamuhla. Laba bagoqela ababili abavela kweleSouth Africa loyedwa ovela kweleBotswana kanye labane abalapha asebehlala bodwa.
Kubikwa kulabantu abangu-121 abahlolwa ngeRapid Diagnostic Tests (RDT) kanye labangu-272 abenziwa iPCR elizweni lonke jikelele okwenza kube labantu abangu-67 105 asebehloliwe.
Umbiko lo usukhuphule isilinganiso sabantu abalegcikwane leCovid-19 saya ku-58 koBulawayo kukanti isilinganiso salabo asebebulewe ngumkhuhlane ofanayo sesikhuphuke saya ku-3. Phakathi kwalabo abalegcikwane sokusile abanye njalo abalitshumi koBulawayo.
