Uncategorized

‘Siziqhenya ngamasiko lesiNtu sakithi’

06 Jun, 2024 - 00:06 0 Views
‘Siziqhenya ngamasiko lesiNtu sakithi’ Amakhosi culture commemoration

uMthunywa

Langelihle Moyo

Umuntu ngumuntu ngamasiko akhe. Bekungasimuntu eAmakhosi koBulawayo kuviki ephelileyo abantu bethe gwaqa lapho obekulusuku olukhulu kunanzwa amasiko lesiNtu. Imvunulo yabantu ibitshengisa ukuthi bayaziqhenya ngesiNtu sabo kungakhethekile ukuthi umuntu ngumhlobo bani njalo ukhuluma luphi ulimi njalo uvela kuliphi icele lelizwe. Bekukhona njalo abebethengisa imvunulo yesintu egoqela ubuhlalu lokunye okutshiyeneyo. 

Abekhona amaqembu atshiyeneyo abesenza adume ngakho ehlabela ingoma zesintu kunye lokugiya ngemigido yesintu. Amaqembu la agoqela Ezimnyama Dance Ensemble, Matojeni Melo, Matojeni Melo, Sekunjalo MaAfrica, lentshantshu zeJikinya Dance Festival abantwana besikolo se-Tennyson Primary. Ngakho-ke obengekho uphuthelwe ngokunengi injabulo konke lemfundiso yamasiko. 

Kuvelile ukuthi abantu bakithi bayawaqakathekisa amasiko lesintu sabo, ngitsho phela lokhu ngoba bebonakalise ngezenzo kunyanga ephelileyo kunanzwa ezamasiko lesintu. Lokhu kubonakale ngemvunulo lokudla kwesintu kunye lemigido lezingoma ebezihlatshelwa lapho. Lokudla obekudliwa ensukwini ezedluleyo bekuyikudla kwesintu.

Emcimbini lo bekuloMphathintambo obona ngokwenzakala kusabelo sakoBulawayo uKhomuredi Judith Ncube obike ukuba amasiko aqakathekile kakhulu.

“Amasiko akithi aveza ubuyithi bethu lemvelaphi yethu lokuthi ilizwe lethu lakhiwe njani. Okunye njalo amasiko lesiNtu kuchasisa inkolo lendlela yokuziphatha kwethu, indlela esikhuluma ngayo lesihamba ngayo lokugqoka kwethu kuyasichasisa ukuthi uvela kuwaphi amasiko. Amasiko ayasichaza ukuthi singobani, kasiziqhenyeni ngawo siwalondoloze. Ngithanda ukubonga ukuba uzulu uphakamile emcimbini onjengalo.

Kungakhethekile ukuthi ungumama, umntwana kumbe ubaba. Lokhu kutshengisa ukuthi siyawaqakathekisa amasiko lesiNtu sethu. Imigido lezingoma zamasiko ebezihlatshelwa lapha ziyaveza ukuba liyawaqakathekisa amasiko,” kubika uKhmrd Ncube.

Ukudla kwesintu okugoqela, isitshwala samabelele, amasi, inkobe, umxhanxa, amahewu lotshwala besintu umaphephetha engaphandlwanga bekugcwele kulumcimbi. Bekukhona njalo izithelo zesiNtu ezigoqela, umtshwankela, umnyi,  umkhomo lokunye okunengi.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds