uMthunywa
Nkosilathi Sibanda
UMGCINISIHLALO weHighlanders uKenneth Mhlophe ubike ukuba loba inguqu ingakadlalwa kuleli, iqembu lakhe lizaqhubekela phambili ngenhlelo zayo.
UMhlophe ukhulume kanje esethula ikit entsha “yethumi yezwe lonke”. Inkokheli le ithe impahla yokudlala le ethungwe yinkampani ye-On the Ball, Looks Sportswear, iyisitshengiselo sokuthi iHighlanders ihleli ilungiselele.
IBosso lenkampani yempahla zemidlalo le, zivumelane ukusebenza ndawonye okwamasizini amathathu alandelayo.
Isizini inye ngayinye, kubikwa kuzasetshenziswa iUS$100 000 kulesi isivumelwano. Abadlali labaqeqetshi bazanikezwa impahla yelanga lomdlalo leyokulolonga. Abalandeli labo bazathengiselwa izikipa.
Aluba isizini ka2020 yadlalwa, iBosso ibizagqoka ikit le, ngokutsho kukaMhlophe
Ngaphandle kokusungula ikit, inkokheli zeHighlanders zitshayelwa ihlombe ngokwenelisa ukulungisa inkundla zeClub House. Inkundla lezi zizasetshenziswa liqembu kumalungiselelo alo emidlalo.
UMhlophe wazise ukuba amanyathelo la abonakalisa ukuthi iHighlanders iyaphambili.
“Lezi zinhlelo zokuphumelisisa iqembu leHighlanders. Loba inguqu ivalwe yiCovid-19, asizange sime ukwenza imisebenzi ethile, “ kutsho uMhlophe.
uKenneth Mhlophe
“Ukuvezwa kwempahla entsha lesivumelwano sethu lenkampani le, kutsho ukuba siyaphambili njengeqembu.”
Isikhulu lesi siyethule isibongo esikhulu kunkampani ye-NetOne ngokuqhubekela phambili isekela iqembu.
Kungenzeka ukuthi iNetOne ibekhona ngomnyaka ozayo kodwa abasiki bebunda bathi kuzavezwa inkampani entsha njalo.
IHighlanders kuminyaka edluleyo ibigqoka ikit ethungwe yinkampani yeRoar.
UMhlophe uthembise abalandeli labathandi bethimu ukuthi bazathola izikipa ezitsha.
“Sizamemezela kubalandeli lapho abangathola khona impahla entsha le.
Iphephandaba likazulu lixhumane loPeter Chiveso umqondisi we-OTB.
“Kuhle njalo kuyasijabulisa ukusebenzelana leqembu leHighlanders.”
