uMthunywa
Ethel Ncube
KUSIGA esihlasimulisa umzimba kulojaha ohlala esigabeni seNsuza kuVillage 1D odingwa ngamapholisa ngoba etshiye egwaze omunye ezitolo kulandela ukungezwani okubekhona phakathi kwalaba ababili andubana adliwe ngumswenya.
Indaba le yenzakale ngoLwesihlanu lweviki ephelileyo lapho umetheswacala uThembelani Sangweni oleminyaka engu-21 yokuzalwa egwaze uCollet Dube oleminyaka yokuzalwa engu-25 ngemva kokungezwani enkulumeni.
Intatheli ixhumane lesinye isakhamuzi esasikhona ezitolo uMnumzana Mike Moyo oveze ukuba ababili laba basukelana ngamazwi baze bacina sebengqikilana ngezibhakela.
“Baqala bethethisana abafana laba omunye etshela omunye ukuthi uyadelela qede uThembelani wahwatsha ingqamu wagwaza uCollet esifubeni. UThembelani uthe esebona uCollet esewele phansi wahle wacela ezinyaweni abantu behluleka ukuthi bambambe ngoba sebemesaba.
“Khathesi ukuthi iqiniso liphume kuhle ukuba bekubangwani alisaphumi, umuyi usethule umabulala laye wabaleka kakabanjwa, udingwa ngamapholisa kakabonakali lapho acatshe khona. Ngakibo labo abamazi ukuthi wabaleka wayangaphi.
“Izakhamizi zalapha lazo ziyamdinga ukuba abotshwe ngamapholisa athole isigwebo esimfaneleyo,” kubika uMnu Moyo.
UMthunywa uxhumane lesikhulumi samapholisa eMatabeleland North uInspector Glory Banda othe indaba le ibingakabikwa ehofisini yabo kodwa bazayidingisisa.
