uMthunywa
Nkosilathi Sibanda
KUZAKHALA enye, kubongolele enye ngeSonto mhla kudlala iqembu leDynamos leHighlanders enkundleni yeBarbourfields ngeSonto emini.
Zombili zibizwa ngokuthi ngamaqembu amakhulu kunguqu yeligi yeCastle Lager, okutsho njalo ukuba kuzangena abantu abanengi Emagumeni.
Umdlalo lo udonsa amehlo ngoba iBosso izafuna ukuthi iqhubeke ngegiya yayo yokuyikhulela iDeMbare.
Iqembu elisekhaya ngeleDynamos njalo lizafuna ukuphindisela phezulu kwethimu yezwe lonke yona esikhokhele kungalane yePSL owemidlalo engu-21, kungela esondelela ukuyigenqula. Loba isinqotshwe imidlalo yayo emibili ilandelana, akusoze kwabangumtshelelo kuDynamos.
Isimo samaqembu womabili siveza ukuba iDynamos ingena lumdlalo ingezethembayo nanko phela idlala kuhle kulezinsuku. Iqembu leli likunombolo yesine kulogu. Selihlohle amabhola angu-25, kuthi iHighlanders isiligaxe ka-16 kuphela. Kumidlalo emihlanu edluleyo, iDynamos yanqoba kathathu, yaphetha ingutshiki lobhanqa kabili.
Lokhe yaqala ukudlalela koBulawayo, ayikadliwa.
Ngakolunye uhlangothi, kumidlalo emihlanu edluleyo, iHighlanders isinqotshwe kabili, yanqoba imidlalo emibili, yabangutshiki lobhanqa kanye.
Kuvulwa inkundla yeBarbourfields ngeSonto, inhliziyo zabalandeli beHighlanders zizabe zibuhlungu ngokukhangela isimo saleliqembu.
Ukunqotshwa kwayo yiDynamos kungadala ukuthi yehle esiqongweni selogu, nanko itshiye iManica Diamonds ngemiklomelo emibili kuphela.
Loba besizwa ubuhlungu, abalandeli abakhulume loMthunywa kuliviki babike ukuba ithimu yabo angeke iyabayangise. Bathe kungcono banqotshwe ngenye ithimu, hatshi iDynamos.
UMthokozisi Nxumalo osekela iHighlanders uthe akujabulisi ukuthi iqembu labo lihlalele evalweni lona liphezulu.
“Asilavalo kodwa kusegcekeni ukuthi iqembu lethu liyatatazela. Kumele sikhuze uvalo ebafaneni bethu ngoba phela sidlala leqembu elandisa ukuthi liqinele phezulu kwethu,” kutsho umlandeli lo.
Uqhubeke wathi: “Asazi ukuthi sizacatsha ngaphi nxa iDynamos inganqoba. Akukholeki ngitsho ukuba singabhayiza sizibone sesikunombolo yesibili, thina sikhokhele kusukela emdlalweni wakuqala.”
UTitus Nyoni ngomunye umsekeli weBosso obike ukuthi kuzamele banqobe loba sekutheni.
“IDeMbare le esizahlangana layo ngeSonto kukhanya iqinile sibili. Ngike ngabukela imidlalo yayo ngavuma ukuthi badlala ibhola elimnandi.
Thina kuBosso kasilawo umdlalo abalawo.
“Ingqobe ikubadlali, ikakhulu kumqeqetshi uBrito. Kadinge wonke amaqhinga alawo, sithembe yena uBrito. Sizayihlabela ingoma yethu yansukuzonke, simtshela uBrito ukuthi sithembe yena,” nguNyoni lo, ohlala esiqintini seNyathi, eMatabeleland North.
UNyoni uthe kakaze akhuthe lomdlalo owodwa nxa iHighlanders isekhaya.
UMellisa Dube uthe akwaziwa ukuthi iyozala nkomoni. “Mina ngiyala, ngeke isidle iDynamos. Ayisimi ngedwa futhi engala kanje. Sonke kuBosso sithi ngeke kwenze.”
IDynamos isidonse insuku iphela idlabuzane ngenxa yokwehluleka ukunqoba kumidlalo yayo kuligi yeCastle Lager.
