Innocent Kurira
NXA kungela sekelo oluvela kumankampani abalisela iSakunda leBetter Brands, ngabe iqembu leHighlanders lidonsa nzima.
Amankampani la kumele atshayelwe ihlombe ngoba iqembu limi ngenxa yawo, ngokutsho kukamgcinisihlalo uKenneth Mhlophe.
“Abaxhasi bethu benza umsebenzi omkhulu, oncomekayo. Uxhaso lwabo lwemali yilo olubambe inhlelo zeqembu njalo luletha inzuzo eyisilinganiso se-78 phesenti,” nguMhlophe lo.
Uthe loba bejabula ngosekelo lolu, kubalulekile ukuthi iHighlanders iqhubeke ngokudinga ezinye indlela zokuthola imali.
“Kulendingeko enkulu yokuthi kube lamanye amaqhinga okukhulisa isikhwama semali ngoba indleko zeqembu zinengi. Sisiyaphambili, kumele sibe lezinye indlela zokudinga imali, sehlise ukwamukela kumankampani. Lokhu kubalulekile,” kutsho uMhlophe.
Uveze ukuthi amaqhinga abalawo ngokuthi bathengise impahla enjenge zikipa zeqembu. Okunye akubalisileyo umgcinisihlalo yikuhuga ababukeli enkundleni, kumidlalo yabo besekhaya, eBarbourfields Stadium.
“IHighlanders isalele emuva ekudingeni imali ngoba ithembele kumankampani ayixhasayo. Izikipa zeqembu kazithengiswa kodwa siyazi ukuthi zilenzuzo.
“Kumele sidonse abantu bezobukela iqembu, sithengise impahla ukuze sengeze inzuzo ifike ku-30 phesenti. Lokhu ngeke sikuthathe kancane.”
Umgcinisihlalo weBosso lo uthe kuyadanisa ukuthi imali abayithola emagedini enkundla, yi-16 phesenti njalo ifika iUS$4 000 ngomdlalo owodwa.
“Inzuzo emagedini enkundla yi-16 phesenti, okutsho ukuba eqinisweni sithola iUS$4 000 kweminye imidlalo.
“Kumele sifinyelele i-30 phesenti. Kwelakithi kasila ama-broadcasting rights, angasinika i-40 phesenti. Ukuthengiswa kwempahla kuletha iphesenti eyodwa kodwa kwezinye indawo e-Africa kule-10 phesenti,” kutsho uMhlophe.
Uthe kunyanga eziyisithupha ezizayo kuzaba lotshintsho olukhulu kuHighlanders ngoba iqembu lizafuna ukuqinisa inhlelo zokuphathwa kwemali.
‘Sizasebenzela ekuthini silandele izicebiso ze-audit, kwezocwaningo lwezemali ukuze inhlelo zeqembu zibemgceke. Lokhu kuzabaluleka kunyanga eziyisithupha ezizayo.”
Ingwalo zemali yeBosso zihlolwa yinkampani yeBakerTilly yona ebike ukuba inkokheli zeqembu zehluleke ukwethula ubufakazi obugcweleyo ngesimo semali yeqembu, kucubungulwa indleko zomnyaka odluleyo.
UMhlophe uthethe isikhundla sobumgcinisihlalo kuJohnfat Sibanda ekuqaleni komnyaka. Uthe bazafuna njalo lokuthi baqale ukukhulumisana labadlali abalesivumelwano labo esiphela ngoMpalakazi lonyaka.
“Sizaxoxisana labadlali abalama-contract aphela lonyaka. Sizakhuluma njalo labaxhasi bethu ukuze sihlaliseke ngekusasa lethu,” kutsho uMhlophe.
