uMthunywa
Siphathokuhle Ngulube
Salibonani bafundi. Ngithemba liyiqhuba kuhle imihloliso. Abanye isisiya emaphethelweni. Kungekudala nje isivuno siyabe sesiphumile. Kambe wena ubona angathi uzavunani? Phela isivuno esihle asibuyi mahala bafundi.
Indoda kumele iginqe isebenze nzima yikho phela ukuthi umuntu atshaye umlozwi nxa siphuma isivuno. Abanye bathembe ukuthi bazavika ngezinto ezimbalwa ezibenze bangaphumeleli.
Konke lokhu akusizi bafundi ngoba impilo ngeyenu. Abanye benu baduba ngokusuka babone angathi basebenzela omunye umuntu bakhohlwe nje ukuthi bazibhakela elabo ikhekhe abangasoze balibangiswe muntu.
Zizaba khona izinkulumo ezizazwakala kwabanye benu ngoba impumela ingasaphumanga kuhle. Ngike ngaxoxa labanye abafundi ngezwa omunye esithi,
“Aaah thina asisoze senze kuhle ezifundweni zethu, phela kasifundanga kuhle ibanga lakuqala lelesibili ngenxa yomkhuhlane weCovid.”
Engikunanzeleleyo ngomfundi lo yikuthi usenanzelele ukuthi ubesilela ekusebenzeni kwakhe ngakho usehle edinga indlela yokuzimela nxa impumela ingasaphumanga kuhle. Ngiphinde ngazibuza ukuthi njengoba iCovid le ibingeyomhlaba wonke kambe nguye yedwa yini ongasoze enze kahle. Kambe kutsho ukuthi ilizwe lonke alisoze liphumelele lonyaka.
Angiboni kunjalo bafundi. Omunye njalo umfundi uzwakale exoxa labangane bakhe esithi,
“Aaah thina asisoze siphumelele sibili kambe amaCala wonke la ebesiwenza asithathele isikhathi esinengi kakhulu. Mina ngisiswele sibili isikhathi sokubala.”
Umfundi lo uzama nje ukucatsha ngomunwe kodwa eqinisweni ngeke kube yimbangela yokungenzi kuhle le ngoba phela amaCala la awaqalanga lonyaka, bakhona asebedlule kuwo benza kuhle kakhulu. Okunye njalo amaCala la akhona ukulisiza ukuze lenze kahle kakhulu. Kuhle liwathande liwenze ngokuzimisela.
Phela abanye benu belihlupha ababalisi lingafuni ukuhambisa amaCala lifuna ukulandelelwa likhohlwe ukuthi akhona ukuzosiza lina. Ngokunjalo-ke asinganiki imbangela yokungenzi kuhle ibe ngamaCala. Asisebenzeni.
Omunye umfundi njalo uzwakale esithi yena kasoze enze kuhle ngoba kazange athole imali yokubhadalela izifundo ezenziwa ngaphandle kwesikolo. Hawu bafundi, ngubani othe izifundo zangaphandle yizo ezenza umuntu aphumelele? Ayisikho khonokho bafundi. Sebenzani ngokuzikhandla lilalele ababalisi nxa befundisa.
Ayisibo bonke abenze izifundo zaphandle kwesikolo abazaphumelela. Abanye bafunzwe okungayisikho phandle okubenze bahlanhlatha bangena iganga. Abanye bazaphuma bezihambela bengaphethe lutho izimali zabazali zihambe zikhala.
Kunengi abanye benu abazakutsho nxa bengasaphumelelanga kodwa okusalayo yikuthi impumela ngeyenu. Ungaze uzame ukuziyenga ngezinkulumo ezithile kodwa impumela ngeyakho, ngeke iguquke nje itshaya wena ngqo!
Asisebenzeni nzima, singabi yilaba abazadinga imbangela zokuthi kungani bengenzanga kuhle, phela sivuna lokho esikuhlanyeleyo.
Asihlanganeni ngeviki ezayo.
