‘Simfuna emsindweni’. . . Kabizwe kumaWarriors uLawrence Mhlanga

23 May, 2024 - 00:05 0 Views
‘Simfuna emsindweni’. . . Kabizwe kumaWarriors uLawrence Mhlanga uLawrence Mhlanga

uMthunywa

Fungai Muderere

NGOKUDLALA kuhle akwenza kulezinsuku, umdlali weFC Platinum, uLawrence Mhlanga sekumele abizwe kuqembu lamaWarriors.

Lo ngumbono wabalandeli bebhola, abadlali bakudala kunye labadlali bakhathesi asebencome umdlali lo okumangalisayo.

Bathe kumele adlale kuqembu lesizwe. Kumkhankaso weligi yeCastle Lager, uMhlanga usehlohle amabhola amathathu, ehlohla ngekhanda.

Wahlohla elakuqala lapho iqembu lakhe lisiba ngutshiki lobhanqa 2-2 leChicken Inn eMandava Stadium. Elesibili waligaxa entanjeni besidla iHighlanders 2-0 eBarbourfields. Elesithathu walihlohla bedlala leHwange, benqoba 3-1 eMandava.

UMhlanga usephethwe emlonyeni kunkundla zokuxhumana. Abantu bathi kabizwe kumaWarriors.

“Qaphelani lina elikhetha abadlali bamaWarriors. ULawrence Mhlanga sicela laye abizwe,” kutsho owake waba ngumgadli weHighlanders uGraham “Grazo” Ncube kuFacebook.

LoPriscilla “Cynkwa” Ncube owadlalela iqembu lesizwe labesifazane amaMighty Warriors uvumelane lombono kaNcube.

Umntaka mqeqetshi wabonozinti uPeter “Oxo” Nkomo, uBrian uqakezele uMhlanga isandla.

“Utshovile uLawrence, kabizwe,” kutsho uBrian, laye owake walikhaba kuBosso.

Owake wadlala loMhlanga kuFC Platinum uWinston Mhango usekele wathi abaqeqetshi bamaWarriors kumele bambone umdlali lo.

“Befuna bengafuni kumele umfana adlale ku-national team,” kutsho uLawrence Gumede kungxoxo yeFacebook le.

Kusenjalo, amaWarriors aqhubeka ngomkhankaso weWorld Cup ngemidlalo kuGroup C leqembu leLesotho enkundleni ye-Orlando Stadium eGoli mhlaka 7 Nhlangula. Ngemva kwamalanga amane, azadibana leSouth Africa eFree State Stadium.

Inhlanganiso yeZifa Normalisation Committee kayikatsho ukuthi izaqhatsha bani esikhundleni somqeqetshi kodwa intatheli zeZimpapers Sports Hub ziphethe udletshana lokuthi kuzakuba nguBaltemar Brito.

Abanye abaqeqetshi abahamba phambili babalisa uWinfried Schafer oweGermany, loCharles Mhlauri oseMelika.

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds