Uncategorized

SILO KHULU: Inhlupho zalamuhla – Ngibona angathi ngidlisiwe

17 Sep, 2020 - 00:09 0 Views
SILO KHULU: Inhlupho zalamuhla – Ngibona angathi ngidlisiwe

uMthunywa

Kasafuni siye emacansini
Ngingowesilisa oleminyaka engu-49 ngithandana lowesifazane ole-47. Sesithandane iminyaka engaphezu kwengu-15 kukanti silengane eyodwa eyintombazana eleminyaka engu-15. Inkinga yami yikuthi akasafuni siye emacansini. Ukwenza kwakhe kungenza ngibone sengathi akasangithandi noma mhlawumbe usengijolela. Kwenziwa yini ukuthi angangitsheli ukuze ngingachithi isikhathi sami ngento engekho? Ngicela ungisize Khulu.

Impendulo:
Akujwayelekile ukuthi umuntu wesifazane avele angafuni ukuya emacansini nje kungonakalanga lutho. Ake uzinike isikhathi sokukhangela ukuthi kungabe kuyini okumenze wenza lesi isinqumo. Zinengi izizatho ezingenza umuntu wesifazane aphelelwe lulukuluku lokuya emacansini. Ezikhathini ezinengi kubangelwa yikuthi kuyabe kukhona okumkhathazayo emoyeni wakhe okumenza azizwe engahaleli ukuya emacansini.

Kwesinye isikhathi abanye bayala ukuya emacansini nxa kuke kwaba lokungathembeki kulobo budlelwano. Lokhu akukuhle, kepha kuyinto eyenzekalayo. Umuntu wesifazane usuka asebenzise ucansi ukuveza ukucunuka kwakhe kanti uyabe esephambanisa ubudlelwano kodwa uyabe engaqondanga ukwenza lokhu. Akuzame ukuhlala lesithandwa sakho phansi usazise ngokuthi lokhu kukuphatha njani. Nxa kuyikuthi usakuthanda futhi uzimisele ngawe uzakutshela ukuthi kuyini okumudlayo. Kungenzeka ukuthi kukhona okwenzakeleyo kuminyaka ebelithandana okudale ukuthi acine esetshintshe ngalindlela.

Umama wengane zami uthuka umkami efonini
Ngilenkinga kamama wezingane zami ohlezi efona ebusuku athuke umkami efihle inombolo. Umama lo uyabuya acatshe ngike ngambona kumaviki ambalwa edluleyo. Ngeviki edluleyo umakhelwane umbhace emi lapho esiphosela khona izibi. Okubuhlungu umkami sewake watshontshelwa amaphenti akhe lamabhodi ecingweni. Sengisola yena manje umama wezingane. Ngenzenjani?

Impendulo:
Kumele ume mzukulu njengendoda. Kungaba kuhle ukuthi uyobikela abomdeni uthumele idombo lakho liyokhuluma labakibo kucace ukuthi awulwi kodwa awukuthandi akwenzayo. Nxa angaqhubeka ngento yakhe usungayabikela amapholisa liye emthethwandaba uyenikwa i-peace order. Nxa angaqhubeka emhlukumeza kutsho ukuthi uyabe esefuna ukujeziswa ngabomthetho. Akuzame Mzukulu ukuyiphatha ngale indlela indaba yakho.

Ngibona angathi ngidlisiwe
Ngingowesilisa ngilenkinga, ngisola sengathi usisi engithandana laye ikhona into asengenze yona. Yebo ngingumuntu olothando ngiyazazi kodwa indlela engimthanda ngayo yena idlula esengake ngathanda ngayo abanye. Asihlali ndawonye, ufika ezongivakatshela kodwa nxa esehamba kuvele kuthi angikhale kakhulu ngithi angahambi noma ngihambe laye. Ngifisa ukuyahlala laye ngendlela engimthanda ngayo. Kuthi lanxa engadobhi ucingo lwami ngiyahamba ngiyomlunguza ngakibo kwezinye izikhathi ngicina ngingena ngizicelise amanzi.
Lolu thando aluhambi lodwa ngeke, sengize ngingathi ngiyaphambana. Ngiyazibuza ukuthi kungani ngimthanda kangaka? Ngiyafisa ukumlobola ngimenze umkami kodwa manje ngibona sengathi ngizacina sengiyindoda ngebizo. Ngicela ungibonise ngenzenjani?

Impendulo:
Akulungile ukusola umuntu ukuthi kukhona akwenze khona wena ungakaze umbambe. Akukho okubi ngokuthanda umuntu wakho. Nxa kukhona okusolayo kumele usukume-ke wenze okuthile. Mhlawumbe umsola nje akakwenzanga lutho wena uyamthanda kakhulu. Kungakuhle futhi umlobole ukuze liphangise ukuhlala lonke libe seduze duze. Lokho kuzakusiza ukuthi ungabi usiya mdinga ngakibo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds