uMthunywa
Thokozile Mbedzi
BASELE bedanile abemuli yomfana obulelwe elokitshini leNew Magwegwe ngeviki ephelileyo kulandela ukunanzelela ukuba baphiwe isidumbu esingayisiso ngesikhathi belungiselela ukubeka umntanabo.
Ngokutsho kwesinye isihlobo somntwana esingathandanga ukuqanjwa ngebizo umngcwabo walumfana oleminyaka engu-14 yokuzalwa okubikwa wangenelwa ngoguluva bathatha impahla endlini batshiya bembulele udluliselwe phambili ngesizatho sokuba izihlobo beziphiwe isidumbu esingayisiso.
Abantu babelokudana okukhulu sebephathelwe isidumbu esingayisiso ngenye indlu yamakhaza yakoBulawayo.
Isihlobo lesi sithe umngcwabo udluliselwe phambili ngoba isidumbu somfana besesihanjiswe eNyanga sisiyabekwa khona kukanti bona bebephiwe isidumbu somunye njalo umfana okubikwa ukuthi wafa ngokuzibophela kodwa emdala kulalo owabo.
“Abenze iphutha ngabe motsha ngoba ngokubona kwethu bangabe bathwala izidumbu zabafana laba ababili ngemota eyodwa kwasekusiba lokuphazamiseka kokuthi owabo nguphi.
“Sathi sikubona ukuthi sitshintshelwe isidumbu sahle sababikela imotsha bathi bekhangela amaphepha abo basitshela ukuthi owethu umntwana useseNyanga.
“Khathesi sididene amakhanda ngoba isidumbu somntanethu asazi ukuthi benza mkhuba bani kiso, sesaba ukuthi sesingaba lengozi ngemva kokumbeka.
“Abemotsha besibacelile ukuthi bangahambisi isidumbu lesi abasebesinike sona eNyanga owethu umntwana engakabuyi kodwa sokulensuku ezimbili bengatsho lutho ngokuphenduka komntwana.
“Sibamelele ukuthi baphendukise owethu umntwana,” utsho njalo.
Kubikwa uBright Mayibongwe Dube obengumfundi esikolo seMagwegwe High School wabulawa ngoguluva abamngenela endlini batshontsha lempahla beqeda lapho badliwa ngumswenya.
Ekhuluma lentatheli kaMthunywa uZamani Mpofu ongumakhelwane uthe balokudana ngesehlakalo lesi.
“Udadewabo kaBright wamtshiya yedwa ngalobobusuku waya emsebenzini kodwa ngokuswelakala kwenhlanhla umntwana wangenelwa ngoguluva abatshontsha impahla endlini batshiya bembulele.
“Phezu kwalokhu isidumbu sitshintshaniswe lesinye kambe izihlobo zizaze zihlaliseke nini,” kutsho uMpofu.
Okwakhathesi izihlobo lokhe zisalindele umbiko ovela kwabemotsha ukuthi zizwe ukuthi isidumbu somntwana sizafika nini koBulawayo ukuze zenze amalungiselelo masinyane zimbeke.
U-Inspector Abednico Ncube
Isikhulumi samapholisa koBulawayo uInspector Abednico Ncube uthe kuliqiniso ukuthi kulomfana owabulawa kabuhlungu eNew Magwegwe ngeviki ephelileyo kodwa okokuthi kube lokutshintshaniswa kwezidumbu ubelokhu engakakuzwa.
