uMthunywa
Nkosilathi Sibanda
USEBAKHETHILE abakhe abadlali umqeqetshi wama-Warriors uZdravko Logarusic.
Abalandeli beqembu lesizwe ama-Warriors sebekwazi ukuthi ngubani ozadlala kuqembu elizamelana leSouth Africa ngoLwesihlanu lweviki ezayo, mhlaka 3 Mpandula.
Ama-Warriors angena lumdlalo kumkhankaso weWorld Cup ozaqala enkundleni ye-National Sports Stadium.
Kumdlalo olandelayo, mhlaka 6 kuMpandula, iZimbabwe ivakatshela i-Ethiopia.
Kulindwe ngabomvu ukubona ukuthi uLoga uzalihlela njani leliqembu elilenengi labadlali abadlala kumaqembu aphetsheya.
Ubabizile bonke abalodumo abaseNgilandi ababalisa intandokazi ye-Aston Villa uMarvelous Nakamba loTendayi Darikwa odlalela iWigan Athletic.
Ezase-France, uTinotenda Kadewere loMarshall Munetsi labo bakhethiwe. Ingcitshi zabadlali abatshibilika kuligi yethu ngeke basole ukuthi uLoga ubakhohliwe, nanko phela sebeqede umnyaka olengxenye bengadlali.
Engakakhethi lumqeqetshi, besekukhononwa emakhasini obulembu ukuzwa ukuthi umqeqetshi wama-Warriors uZdravko Logarusic uzakhetha bani.
Umaneja wama-Warriors uWellington Mpandare utshele uMthunywa lamuhla emini ngemva kokubikwa kweqembu wathi abalandeli abahloniphe umbono womqeqetshi.
“Asifakeni ithemba kumqeqetshi wethu. Abadlali abakhethileyo ubebabonile ukuthi yibo abafanele uhlelo lwakhe,” kutsho umaneja lo.
Ama-Warriors angene kumkhankaso we-World Cup lo ngemva kokumiswa ngo-2018.
