uMthunywa
Thokozile Mbedzi
ABALIMI bakhuthazwa ukuba basike utshani bemvelo ngoba buqakathekile ezifuyweni nxa bungahlanganiswa lama-protein blocks.
protein blocks
Ekhuluma lentatheli kaMthunywa, uLivestock Consultant uMnumzana Simon Mulambo uthe abalimi kabasike utshani ngoba sobusoma njalo kabusela ma-protein aqakathekileyo ezifuyweni.
“Abalimi kabasike utshani bezifuyo babugcine kuhle ukuze babuhlanganise lama-protein blocks ezifuyo ukuze zithole ukudla okudingwa yimzimba yazo.
“Abalimi sebengaqala ukunika izifuyo zabo ukudla okuhlanganiswe lama-protein blocks loba zingakabi lezitshengiselo zokucaka ukuze zingafiki kusimo sokucuba.
“Abanye abalimi baphambanisa ngokuthi bafuna ukuqala bazibone sezisehluleka ukuhamba ukuthi baqalise ukuzipha ukudla okuqondileyo,” kutsho uMnu Mulambo.
Uthe ukulindela ukuthi izifuyo ziqale zicube ukuthi zidingelwe ukudla zinikwe kwenza abalimi bacine belahlekelwa yizifuyo zabo njalo lendleko zicina zisiba zinkulu kubalimi.
“Abalimi kabaphatheke kakhulu ekusikeni utshani babulondoloze ngendlela eqondileyo ngoba lonyaka utshani bebubunengi.
“Abalimi kabasebenzise ithuba leli ikakhulu abasezindaweni lapho okulotshani khona babusike babugcine kuhle endaweni eziqondileyo.
Lokhu kuzenza abalimi bengabi lendleko ezinengi kakhulu lanxa bengathenga ama-protein blocks utshani bayabe belabo obokuhlanganisa okwenza indleko zibe phansi,” nguMnu Mulambo lowo.
Uthe ukugcina utshani kwenza kube lula kubalimi ukuthi bafeze inhlelo zabo ikakhulu labo abayabe befuna ukuthengisa ezinye izifuyo ngoba bayabe belakho ukudla kokunika inkomo ukuze isisindo zazo sikhwele.
Uphethe ngokuthi ukuhlala umlimi elungiselele kuqakatheke kakhulu ukuze angalahlekelwa yizifuyo ngokucuba.
