uMthunywa
Thokozile Mbedzi
ABALIMI kundawana zonke zelizwe sebekhuthazwe ukuthi basike utshani bezifuyo babulondoloze ngoba yiyo kuphela indlela engabasiza ukuthi bangadubeki ukudla kwezifuyo ngesikhathi sebusika.
Ekhuluma lentatheli kaMthunywa uMnumzana Simon Mlambo onguTechinical Adviser uthe abalimi kumele basebenzise ithuba leli ukuba basike utshani njengoba izulu libe linengi, lotshani ngokufanayo.
“Lonyaka izulu libe linengi njalo utshani bunengi kakhulu ngakho abalimi kabathathe lelithuba basikele izifuyo zabo utshani ukuze bahlale belungiselele isikhathi sokoma.
“Izifuyo lonyaka akumelanga kube lesikhathi lapho ezizaswela khona ukudla ngoba lonyaka yinala yodwa.
“Izifuyo kumele zithole ukudla okwaneleyo ukuze zingacubi,” kuchaza uMnu Mlambo.
Uqhubekele phambili esithi kumele utshani bungaphela emadlelweni abalimi baqalise ukunika izifuyo zabo utshani abayabe bebusikile babugcina.
“Abalimi nxa bangasikela izifuyo zabo utshani khathesi kuzabaphathisa kakhulu ngoba ngeke balahlekelwe yizifuyo zabo nxa zingaqhubeka zithola ukudla ngesikhathi esiqondileyo,” kutsho uMnu Mlambo.
Uthe lonyaka kabakhangelelanga ukuthi kube lomlimi ozalahlekelwa yizifuyo ezinengi ngenxa yokucuba ngoba utshani bunengi.
“Kuminyaka edlulileyo abalimi bebelahlekelwa yizifuyo ezinengi ngenxa yokucuba kodwa lonyaka ngoba ukudla kunengi emadlelweni abalimi kumele bahle baqale khathesi ukulungiselela isikhathi sokoma ngoba akumelanga kube lomlimi olahlekelwa yizifuyo.
“Kungakho-ke sikhuthaza abalimi kundawana zonke ukuthi kabakhuthale basike utshani ngoba lemlilo yendle layo ibamnengi nxa kulotshani obunengi izifuyo zicine ziswela ukudla kukanti bebungalondolozwa busikiwe bafakwa endaweni eziqondileyo,” kuphetha uMnu Mlambo.
