uMthunywa
Nkosilathi Sibanda
IMINCINTISWANO yezemidlalo ezikolo isivunyelwa kodwa kuzamele kuqaphelwe ukuthi abantwana abaphatheka kumidlalo kube yilabo abahlatshwa ijekiseni yokuvikela umkhuhlane weCovid-19.
Lezi zindaba ezimnandi kubafundi lababalisi asebeqede iminyaka emibili kungela midlalo ezikolo.
Ukumiswa kwemidlalo besekukhathaza ababalisi labazali ngoba bekubona ukuthi ithalenta liyatshabalala ebantwaneni njalo bekhangele ubunzima bokuthi baqale kakutsha ukuqeqetsha.
Ukungenela kukaHulumende kuze njalo ngesikhathi inkokheli zemidlalo ziphose umbono wokuthi akulasizatho sokuthi inkundla zihlale zivaliwe.
Ukuvunyelwa kwezikolo kwezemidlalo kwethulwe nguMphathintambo wezokukhitshwa kwembiko kuHulumende uMonica Mutsvangwa ngemva komhlangano weKhabhinethi ngoLwesibili kuyonale iviki.
“Zonke izikolo zebanga laphansi zivunyelwe ukuqalisa yonke imidlalo. Eze-secondary esezenelise ukufikisa i-70 phesenti yabantwana abahlabe ijekiseni yesibili, zingaqalisa imidlalo lapho abantwana abangasoke bathintane khona,” kutsho uMphathintambo uMutsvangwa.
Uthe kuzamele bonke odokotela bezabelo, ama-provincial medical directors labaqondisi bezemfundo basebenze ndawonye, baphinde banikeze uluhlu lwezikolo esezifikise isilinganiso se-70 phesenti kubantwana abahlatshwe ijekiseni yesibili yokuvikela iCovid-19.
Iphephandaba likazulu lixhumane lenkokheli zenhlanganiso ze-National Association of Primary Heads (Naph) leye-National Association of Secondary Heads (Nash) ababike ukuba uHulumende wenze kuhle ngokubuyisela imincintiswano yemidlalo ezikolo.
Inyathelo likaHulumende lize ngesikhathi iSports and Recreation Commission (SRC) ibeke isikhalazo sokuthi izikolo ziqalise imincintiswano.
Imidlalo ezancintiswa kuqala lonyaka, kuthemu yesibili yezifundo ibalisa ibhola lenyawo, inguqu, ukuqaga, i-volleyball, handball, rugby leminye esebenzisa ibhola.
Ekhuluma lephephandaba likazulu, uMartin Dururu ongomunye wezikhulu zeSRC uveze ukuthi izikolo kuzamele zisebenzise lelithuba libumbe amaqembu abantwana abazamela ilizwe kumidlalo yaphetsheya.
“Kuhle ukuthi uHulumende usenikeze imvumo le. Lokhu kuzaphathisa kakhulu inhlanganiso zemidlalo ukuthi zithole abantwana abalethalenta kumincintiswano yamazwe,” kutsho uDururu.
Martin Dururu
Kumaviki amabili adluleyo uDururu wazisa intatheli yephephandaba likazulu ukuba inhlanganiso yeSRC yaxoxisana logatsha lwezemfundo ukuze inengi lemidlalo yezikolo ivunyelwe ukuthi iqale kakutsha.
“Sihlale phansi labo bonke ababalulekileyo kwezemidlalo yezikolo. Impawu esizibonileyo kuze kube khathesi zitshengisa ukuthi kuqalwe phansi kancane kancane kumidlalo yezikolo.”
UDururu uthe iSRC ilesiqinisekiso sokuthi kuzakuba lula ukulungiselela iqembu lesizwe elizakuya kumncintiswano wamaYouth Games ngoNcwabakazi.
“Le yimidlalo yebanga lezikolo, ngakho-ke sithi ukuze iZimbabwe ilungiselele kuhle ukuhlanganisa iqembu eliqinileyo, sidinga uhlelo lwemidlalo ezikolo zethu ukuthi luqhubeke,” kutsho uDururu.
NgoLwesithathu umongameli weNash uArthur Maphosa utshele uMthunywa ukuthi kade belindile.
“Sesize safika isikhathi akade sisilindile. Ukuqala kwemidlalo zindaba ezimnandi kubafundi bethu,” kutsho uMaphosa.
Uthe izikolo ze-secondary zizavunyelwa ukuqhubeka ngemidlalo nxa zingaqeda ukuhlabisa abafundi ngoNhlangula.
Nash uArthur Maphosa
“Nxa kuphela uhlelo lokuhlabisa abantwana, imidlalo esebenzisa ibhola izavunyela. Siyakwamukela okwenziwe nguHulumende. Lokhu kuzavikela abantwana ukuthi bangenzi ubugebenga,” nguMaphosa lo.
Abezemfundo yebanga laphansi labo bajabulile.
“Kuyajabulisa lokhu, zindaba ezinhle. Silokukholwa okukhulu ukuthi ukuphenduka kwemincintiswano kuzaphathisa abantwana lababalisi bethu,” kutsho uCynthia Khumalo umongameli weNaph.
