uMthunywa
ABALANDELI labathandi bebhola eSouth Africa bazaqala ukuvunyelwa emidlalweni yePremier Soccer League (PSL) ngemidlalo yama-quarter final eNedbank Cup, ezakuba mhlaka 8 Mabasa.
Lokhu kumenyezelwe kuliviki ngusihlalo wePSL, u-Irvin Khoza.
Ngaphambili kwalokho, amalunga aphezulu ePSL ebelomhlangano oqale ngoMvulo lapho ebekucutshungulwa yonke imigomo yeCovid-19 emitsha emenyezelwe nguHulumende wakulelo.
Ngesikhathi eyimemezela imigomo le, uMongameli welizwe, uCyril Ramaphosa, uthe izinkundla zemidlalo sezingamukela u-50% womthamo wabalandeli.
“Abalandeli bazaqala ukuvunyelwa mhlaka 8 lo-9 kuma-quarter final eNedbank Cup. Bekuzaba nzima ukuthi siqale ngemidlalo yalempelasonto njengoba leyo midlalo ibisivele ibekwe ezigabeni ezithile,” kutsho uKhoza.
Uqhubeke wathi, “Ngiyakugcizelela ukuthi abalandeli kumele kube ngabahlatshiweyo futhi baphathe izetifikethi zabo ezitshengisa lokho. Nxa kungenjalo, akube ngumuntu olobufakazi bokuthi uhloliwe esikhathini esingaphansi kwamahola angu-72.”
