uMthunywa
Leonard Ncube
IZAKHAMIZI zesigabeni seHwange ikakhulu eChisuma kanye leSizinda sezihlezi ziphethe izibindi ngezandla kulandela ukubonakala kwabomaquphula endaweni le abane ngenyanga yinye.
Kuviki ephelileyo uMthunywa ubemumuthe udaba lwesigabeni seTemani eHwange lapho abantwana abathathu abadutshukelwe ngumaquphula egumeni. Ingozi le ibangele ukuthi omunye wabantwana laba oleminyaka engu-11 aqunywe unyawo kuthi omunye aqunywe isandla.
Mhlaka 23 Zibandlela, umlisa weDibutibu ngaphansi kwenduna uMvuthu, uMnumzana Jabulani Ncube (51) wabona umaquphula obizwa ngokuthi yiM969 esegangeni ebutha inkomo.
Omunye wabonwa ngesinye isakhamuzi uMnumzana Chitida Dube (61) wesigabeni seSizinda mhlaka 11 Nhlolanja.
NgoLwesihlanu kuviki ephelileyo kulengcitshi zebutho lesizwe ezihambe ndawonye lamapholisa kule indawo ukuze kuyosuswa omaquphula laba.
Ukuchwayisisa kwamapholisa kutshengisa ukuthi omaquphula laba babe segcekeni ngenxa yezulu ebelisina elizweni.
Kuminyaka edluleyo kwaqhutshwa uhlelo lokususa omaquphula endaweni eziseduzane lemgcele lapho ababefakwe khona ngesikhathi sempi.
Amapholisa asebenza endaweni lezi aseqalisile ukwenza imkhankaso befundisa uzulu ukuba aqaphele.
Omele induna uMvuthu, uMnumzana Bishop Matata Sibanda uthe abantu abangaphansi kwakhe sebehlalele evalweni.
“Siyazi ukuthi omaquphula laba bake basuswa, kungakho laba asebevumbuluka kungabe kubangelwe yikuna kwezulu. Thina abadala siyabazi uhlupho lusebantwaneni. Kungakho sizama ukulimukisa umphakathi ukuthi bangahlangana lensimbi abazisolayo kumele babikele amapholisa loba abadala besigaba.
Ensukwini ezisanda kwedlula kubonakale omaquphula abathathu. Abantu bayesaba sibili, kodwa siyabathembisa ukuthi okubalulekileyo yikuthi bangabambi ukuze baphephe,” kutsho omele induna uMvuthu.
