uMthunywa
Nkosilathi Sibanda
ZIQALISILE ukuncintisana kuligi ka-Division One eNkabazwe nanko phela iFilabusi United ibambe iKwekwe United nge 0-0 kumdlalo wokuvula isizini.
ENkabazwe sekugcwaliswa inkundla ngesikhathi amaqembu asemhlubulweni ongezansi yelizwe esehluleka ukubhadala imali yokudlala, osekudale ukuthi iligi le iphuze ukuqalisa.
Izikhulu zeFilabusi zibika ukuthi ziyasuthiseka ngemisebenzi yabaqeqetshi abenelise ukuthi babumbe ithimu ephuma emaphandleni ezamisana lenkunzi zamathimu aselesikhathi eside eku-Division One.
Kumdlalo wokuqala iFilabusi United ikhethe abadlali ababalisa uManuel Nyoni, Terrence Nyoni, Samson Ezinhle, Amos Ayode, Elias Sibanda, Parkington Mazhawu Phindani Ngwenya, Michael Sibindi Mandlenkosini Mkhwanazi, Nxusani Thoba loKudzai Chipunza.
Umaqhuzu waleli iqembu uMkhululi Mthunzi uthe okubanikeza iveve njengoba sebeqalile ukudlala lusekelo abaluthola kubabukeli bemidlalo yabo labathandi beqembu.
Uthe ukuhlangana lomphakathi andubana baqale isizini yikho okwabanceda kakhulu.
“Saluthola usekelo, sifisa ukuthi abalandeli bethu beze bezosekela kumidlalo yonke,” kutsho uMthunzi.
Iqembu lakoGodlwayo leli lenza idili eMthwakazi Hall ngemizamo yokuthola abantu abangayilandela.
Lisuke kuDivision 2 ngesizini lihlezi kunombolo yesibili kulogu okuyikho okuyivulele ithuba lokungena kuDivision One weNkabazwe.
“Senza kuhle ngokwazisa iqembu ebantwini. Bakhona abakade bengelaqiniso lokuthi sizadlala ku-Division One, sesikwenzile,” nguMthunzi lo.
Uqhubekele phambili esithi iqembu lakhe alilawo amabizo abadlali bodumo kodwa uyathemba ukuba abadlali bakhe bazakwenza loba yini ukukhulisa ibizo leqembu lesigaba sakoGodlwayo.
“Okwakhathesi asilabo abadlali abadumileyo kodwa silabo abadlali eFilabusi abayibo abasiletha kulelizinga likaDivision One njalo sizimisele ukusebenza nzima lokwenza loba yini ukukhulisa ibizo leqembu lethu lesigaba sakoGodlwayo okuyikho okuzalwa khona leliqembu leFilabusi United,” kutsho uMthunzi.
“Iqembu likhangelelwe ukusebenza njengenqola yentuthuko emdlalweni webhola lasempilweni zabadlali bethu. Sikhangelele ukuhlala kuDivision 1 kodwa nxa ithendele lithe lawela ekhaya siyafuna ukuya ku-PSL,” kutsho uMthunzi, owake waba yisiphathamandla senguqu koBulawayo.
Impumela yeligi eseNkabazwe:
Gokwe North 3-3 Vumbachikwe, Dendairy 2-0 ZRP Gweru, Ivan Hoe 0-0 Whawha, Dulibadzimu 1-0 ZPC Munyati, Blanket Mine 3-2 Real BVM, Shabanie Mine 1-0 The Venue, MSU 0-0 Platinum under-19.
