uMthunywa
Bongani Ndlovu
KULOMHLABELELI wakuleli osezakhele udumo kweleSouth Africa nanko phela injongo yakhe yikuthi abe ngumculi odumuleyo kusizwekazi seAfrica.
Umculi u-Adrain ‘‘Slimm’’ Mahole (26) owaziwa ngengoma zakhe uKaShort Base, Ndorangarira, Zim Zim, Siyathandana loKuzama Kushanda azikhipha ngesikhathi esaseZimbabwe ukhulume lephephandaba likazulu ngobuhle lobubi bokusebenza uhlala khatshana lekhaya.
Ekhuluma lentatheli kaMthunywa uAdrain ‘‘Slimm’’ Mahole ubikele intatheli ukuba akula ndawo engela bunzima kodwa umuntu kumele aqine.
“Yonke indawo ilabo ubunzima bayo kanye lobuhle bakhona kodwa mina engikukhangeleyo yikugijimisa iphupho lami lokuba ngumculi odumileyo e-Africa,”
“ESouth Africa akufani leZimbabwe ngoba amathuba abaculi manengi njalo labantu bakhona bathanda imihlobo etshiyeneyo yomculo kungakho lami ngiyenelisa ukuyatshaya endaweni ezehlukeneyo ngisiyaveza ubungcitshi bami.
Uqhubekele phambili waveza ukuba ukuhamba kwakhe eGoli sekumenze wakhula njengomculi njalo kwamhlanganisa lengcitshi zaseNingizimu Africa.
“Angikabi lomnyaka ogcweleyo ngilapha kodwa sengenelise ukukhipha ingoma ezimbili ezithandwe ngumphakathi.
Eyokuqala ethi Ndorangarira leyesibili ethiUthanda Abafana lenye esisayiqedisa ethi Ka-System kako,” nguSlimm lowo.
“Ubuhle bomsebenzi lo yikuthi awusebenzi wedwa njengomculi kodwa usebenza labanye asebesaziwa.
Kunjenje ngisebenza lomculi othiwa nguLunchbar loCure Masyve,” kuveza uSlimm.
Uqhubekele phambili waveza ukuba ukuhlabela uhlala eNingizimu yebo kuyinto enhle kodwa kunzima.
“Ukuhlabela useNingizimu kuyinto enhle kakhulu ngoba amathuba akhona okungafani lakithi kodwa ubunzima bangapha yikuthi thina siyizivakatshi kungakho kuba kunengi okufuna imali,” kuphetha uSlimm.
