‘Sesidiniwe ngokudliwa’

22 Aug, 2019 - 00:08 0 Views
‘Sesidiniwe  ngokudliwa’

uMthunywa

Wayne Ncube

UMKHANKASO weBulawayo Chiefs kuligi yeCastle Lager ungabe ususondelela ukuphela lonyaka ngoba akulamehluko kumdlalo wayo isizini isingena kusigaba sesibili somdlalo.

Ababukela leliqembu maviki wonke bazavuma ukuba Amakhosi Amahle kungagcono aphenduke enkundleni eziphansi njengoba abadlali bayo betshengisa umdlalo wezinga laphansi njalo.

Isinde ukuxotshwa nyakenye ngokudlala udaka.

Kumdlalo wayo odluleyo, iBulawayo Chiefs izamile ukumisana leqembu eliqhulayo iTelOne nge 2-2. Loba ibithwele nzima kulumdlalo, iChiefs icine ingephezulu ngokulichaya. Lo bekungumdlalo wokuqala Amakhosi Amahle esenza okugcono ngokutsho komqeqetshi wayo.

“Amaqembu wonke asinqobileyo emidlalweni yakuqala sizawabonisa intuthu kusigaba esilandelayo. Ngithanda ukubeka emphakathini ukuthi iBulawayo Chiefs ilakho ukuphuma kusimo ekuso. Asinqotshwa ngokuphangisa ngoba lathi silwisana lamaqembu onke,” kutsho uTawachera lapho eveza ukuthi iqembu kalisafuni ukudliwa selikhangelele ama-points kusiyaphambili.

Ukuze kubonakale ukuthi uTawachera uzimisele ukukhipha iqembu ebunzimeni, kumele anqobe umdlalo olandelayo benxusa iBlack Rhinos.
Zombili zidibana eLuveve ngoMqgibelo.

Lumqeqetshi uthembisa ukuyimisa eyamabutho.
“Akuphindwa kabili ukudliwa ngebhola elilodwa, sifuna imiklomelo ephindaphindiweyo, sibancitshe umdlalo.”

Omunye umdlalo ozacacisa ukuqina kwalithimu yilapho ihlangana leHighlanders kumdlalo owedluliselwa phambili.
Umdlalo lo phakathi kweBulawayo Chiefs leHighlanders ubukhangelelwe ukuthi udlalwe kumaviki amabili adluleyo. Isizatho sokwedluliswa kwalumdlalo kwaba yikwanda kwabadlali beHighlanders abadlalela amaWarriors.

UTawachera uqhubeke wathi: “Silungiselela umdlalo lo njengeminye imidlalo yonke esike saba layo, iBosso liqembu elikhulu sizadlala labo ngokuzimisela ngoba asikhangelelanga ukuthi umdlalo ube lula.

“Abafana sebewulungele umdlalo. Sebelindele nje usuku oluzabekwa ukuthi amaqembu la womabili ahlangane,” kutsho lumqeqetshi.

Ebuzwa ngekusasa lakhe kuPSL, uTawachera uveze ukuthi iqembu lakhe lisebenza kanzima ukuze lingaphumi.
“Kangethuswa yilutho ngoba imidlalo isakhona. Abadlali bethu basebenza nzima, nanko iviki ephelileyo bancitshe iTelOne umdlalo.

Sibakhuthaza ukuthi benze konke okusemandleni abo ukuthi singadliwa okuzabangela ukuthi sicine sikhitshwa kumqhudelwano wePSL.

Abadlali bayazi ukuthi kuyini okungabalahlekela kungenzakala ukuthi siphume kuligi.”

Uqhubekele phambili waveza ukuba Amakhosi Amahle alabo abadlali abangenza izimanga, iqembu liphumelele.

“Njengawo wonke amaqembu lathi silabo abadlali abafana loBrendon Mpofu, uShadreck Nyahwa kanye loTafadzwa Dliwayo abangabadlali bezinga eliphakemeyo njalo abangaba yikusasa yebhola lesizwe.

“Isizini ayikapheli, asazi ukuthi iyozala nkomoni kodwa sisebenza nzima ukuthi imidlalo yethu ibe lempumela enhle. Akula muntu ofuna iqembu lakhe lidliwe,” kuphetha uTawachera.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds