uMthunywa
UMPHUROFETHI u-Ariel Ting umangaze abantu ngesikhathi eveza ukuthi sewaboniswa ngosuku lwakhe lokufa.
Uthi uyesaba ngoba uyazi mathupha ngalokhu okuzakwenzakala kuye kanye labanye abantu abanengi mhla esifa. Lumphurofethi oleminyaka yokuzalwa engu-43 njalo odabuka endaweni ebizwa ngelokuthi Sebokeng ese-Vaal kweleSouth Africa uthi uMdali wamnika isipho sokubona okuzakwenzakala empilweni zabantu.
“Ngibona izinto ezitshiyeneyo ezizakwenzakala empilweni zabantu zingakenzakali,” utsho njalo.
Uthe waboniswa ngodlame olwenzakala kweleSouth Africa ebantwini bezinye izizwe lonyaka lungakenzakali njalo ulakho ukuboniswa insuku zokufa zamalunga emuli, abangane kanye labomakhelwane.
“Ngingatshengiswa ngokufa komuntu, ngiyazithulela, ngikhuleke ngoba abantu abanengi bayabe bengazimiselanga ukwamukela indaba enjalo.”
Wengezelele wathi ngemva kokuboniswa ngokufa kwakhe, wezwa efikelwa yikwesaba.
“Kuzakuza isiphepho esesabekayo sivela entshonalanga kunyanga ezinhlanu kusukela khathesi. Isiphepho lesi sizathatha abantu abanengi kakhulu.”
U-Ting uthe kuzakuba lezikhukhula ezizabulala abantu.
“Ngibona abantu bekhala becela usizo sebegalula, abadala konke labantwana. Ngibona lami lomdeni wami sithathwa yizikhukhula lezi.”
Uthe uvuka ekuseni esiyakhuleka phezu kwenye intaba.
“Ngiyesaba. Ngiyafuna ukuxwayisa abantu ngezikhukhula lezi engiziboniswayo. Ngingaphepha ngizambonga uMdali,” utsho njalo.
Umakhelwane ka-Ting uBonga Sangweni (50) uthe u-Ting wambikela ngokufa kukanina inyanga eziyisikhombisa engakafi.
“Ngangingacabangeli ukuthi akutshoyo kungaba liqiniso kodwa ngemva kokwedlula emhlabeni kukamama, ngakhumbula amazwi akhe,” utsho njalo. — Daily Sun
