uMthunywa
Ngekhefu lePhasika kwakuvakatshe umzukulu wami oseMelika, sabopha ukuthi kusasa kwakhona amadino endizamtshina esephelile sivakatshele ubabakazi.
Nxa usuka edolobheni lakoBulawayo kungumango nje ongatsho lutho, njalo lemota esasihamba ngayo yisilwane somgwaqo eyohlobo lwe-Benz. Phela ukuthi iyagijima ubona ngezihlahla angani ziyancintisana. Wathi sesizaphambuka emgwaqweni sesiqonda indledlana emzini kababakazi sathola kulebhasi eyayibhewukile ivela eGoli idonsa isigengele esasigcwele impahla ezababegadile lezinye ezaziphathisiwe zisiya kuzihlobo labangane.
Eduze lalapho okwakubhewukele ibhasi kwakulenkomponi, bathi besizwa umsindo wokudubuka kwamavili lebhasi isitshaya iquphuna izihlahla banikela khona. Into eyangidanisayo sathi sifika sathola abantu bengelandaba lokunceda abalimeleyo kodwa bethutha impahla zabantu esigengeleni besiyafihla.
Abanye babedinga umphathi-sikhwama ebantwini abalitshumi abasebefile. Abalimeleyo babehlaba umkhosi befuna usizo kodwa wawuthola bebaphuthuma befuna yona impande yesono, yona eyenza uJudasi wathengisa umntakaMaria loJosefa.
Ngaze ngakhwaza okukasayijeni wamajoni ngathi umuntu wonke le, ngapha ngifonela amapholisa le-ambulensi, ngenhlahla akuthathanga sikhathi konke kokubili kwasekukhona. Ngahle ngatshela omunye wamapholisa ukuthi ngibone abantu besiyafihla impahla akade bezikhupha esigengeleni sebhasi bucwadlana lakanye zayathathwa kwabotshwa abathathu baqala ukuqambana njengokubuya lokwazana kwabo njengabahlali benkomponi.
Ngazibuza ukuthi sewayangaphi unembeza wabantu. Kambe ungathi omunye umuntu elimele ejuluka igazi hayi izithukuthuku wena weqe izidumbu uphuthuma abantu kulokuthi uncedise ukukhipha ababanjelweyo usindise imiphefumulo.
Yikho mhlawumbe libona lenhlanya sezizinengi, okunye kusukela ekweqeni izidumbu uphuthuma abantu abalimeleyo lezidumbu zisetshwa zithathelwa imali.
Ingozi zemigwaqweni zingenzeka kuloba ngubani, nxa usenelisa zama ukunceda imiphefumulo hatshi ukugijimisa ukutshontsha yikho abanye abantu besiba leminyama abacina bengazi ukuthi bangayiqeda ngani.
Ayixabene.
