uMthunywa
Nkosilathi Sibanda
ABAFUNDI besikolo seNtunungwe Secondary esigabeni seBulilima East sebezathola imfundiso yesayensi kulandela ukuqala kokwakhiwa kwama-laboratory.
Isikolo lesi lokhe savulwa ngo-2004, asikaze sifundise isayensi ngenxa yokuswelakala kwamakilasi la lempahla eyeneleyo. Ababalisi bahlala endlini eyodwa elamakamelo amathathu.
Loba okwamanje kulamakilasi ayisithupha, izakhamizi zakulindawo zibambanise amakhanda, zadinga amaqhinga okukhulisa isikolo.
Kuncede ummeli weBulilima East uKhomuredi Nqobizitha Mangaliso Ndlovu othenge izamende ezedlula itshumi leyinye impahla ezasetshenziswa ukuqedisa indlu yababalisi.
UKhmrd Ndlovu uphinda abengumphathintambo wogatsha lwezemvelo, umkhathi lokwethekelelwa kwesizwe.
Ekhuluma lentatheli yephephandaba likazulu ngoMvulo, uNdlovu uthe inhloso yakhe ngesikolo seNtunungwe yikuthi siqale ukufundisa isayensi ngomnyaka ozayo.
“Abantwabethu abafundiswe imisebenzi yakulezi insuku ephuma kusayensi. Asifuni ukusalela emuva lokuncitsha abafundi ithuba.
“Sithe sibambane njengomphakathi waseBulilima East sakhe isikolo sethu. Siyizakhamuzi zakulindawo, isikolo ngesethu ngakho ukusebenza ndawonye yikho okuzakwakha isizwe,” kutsho uNdlovu.
Umphathisikolo uMnumzana Desire Mpofu uthe isipho sikaNdlovu sibe yinkuthazo yokuthi kudingwe uncedo ngamandla.
“Siyabonga isenzo senkokheli yethu. Kusinikeza amandla okuthi sizibone siphutsha lumsebenzi omkhulu kangaka.
“Ukwakhiwa kwama-laboratory kuzahuga lababalisi bezifundo zesayensi, kukhaliphise lengqondo zabafundi bethu.”
Labo abafisa ukuncedisa isikolo lesi ekwakhweni i-laboratory le bangathinta umphathisikolo uMnu Mpofu kunombolo ezithi: 0773305181.
