uMthunywa
YiNtatheli kaMthunywa
AMAQEMBU enguqu kunkundla zika-Division One kumhlubulo ongezansi yelizwe azakhala ezimathonsi kulumnyaka nanko phela sekuzamele abhadale imali ezedlula i$25 000 yakuleli ukuthi avunyelwe ukuncintisa.
Amaqembu achinsa ukudlala kuligi le kubikwa azakwehlukana le-$30 000.
Lokhu kutsho ukuba isizini yalonyaka angeke iqale ngesikhathi esifaneleyo njengoba kusaziwa ukuthi ambalwa amaqembu akuligi le alemali. Inengi liyasadalala ukuthola usekelo lwemali. Ukukhwezwa kwembadalo yokudlala le, kuzahle kubhidlize amathimu.
Umbiko ophume emahofisini abaphathi beligi le kuliviki uveza ukuba imbhadalo yalonyaka ikhwele ngesilinganiso senkulungwane. Ngesizini edluleyo, ukudlala ku-Division One bekubiza i$2 000.
Umgcinisihlalo weligi, u-Andrew Tapela uthe isizatho sokukhweza imbhadalo yokudlala sidalwe yikukhwela njalo kwendleko zokuqhuba umsebenzi emahofisini abo.
“Eqinisweni, lo lalowo ofuna ukudlala kuligi ka-Division One kumele azazi ukuthi ulesikhwama semali esiqinileyo. Kumele kucace ukuthi ithimu ekuligi le izimisele ukuthi iyencintisa kuligi ephakemeyo eyePSL.
“Kumele sibe lamaqembu azakwenelisa ukuthi ancintise enkundleni zethu isizini ize iyegqitshwa. Ngakho-ke, kulabo abangeke benelise ukubhadala, kungabe kusitsho ukuba bazenelisa ukuyaphambili kuPSL?”
UTapela ukubeke kwacaca ukuthi ukukhwezwa kwembadalo yabo kudalwa yikuthi nyakenye lakumasizini adluleyo, imbadalo le ibilinganiswe ngemali yakwele Melika.
Kusenjalo, lakwezinye inkundla zika-Division One, imbadalo ikhweziwe.
Iphephandaba likazulu likhulume leziphathamandla zeligi esempumalanga kwelizwe, ezibike ukuba kulelo kuzakhitshwa i$30 000 ngamaqembu avele ekhona kuligi le. Lezo ezichinsa inkundla zisuka ku-Division Two, zizacelwa ukuthi zibhadale i-$50 000.
Kumaqembu akumhlubulo ongezansi yelizwe amatsha kubalisa iBulawayo Chiefs, Quality Foods, Ingagula FC, leqembu leTrumus Warriors.
